Эдийн засгийн байнгын хорооны  өнөөдөрийн хуралдаанаар “Цагаан суваргын ордын төрийн эзэмшлийн хувь тогтоох тухай”  тогтоолын төслийг хэлэлцээд чуулганы хуралдаанаар хэлэлцүүлэхээр боллоо.

Засгийн газраас өргөн мэдүүлсэн энэхүү тогтоолд Цагаан суваргын ордод төрийн эзэмшлийн хувь хэмжээг 34 байхаар зааж өгсөн. Дорноговь аймгийн Мандах сумын нутагт орших Цагаан суваргын зэс молибдений ордын ашиглалтын тусгай зөвшөөрлийг “Монголын алт” компани эзэмшдэг юм байна. Тус компани 2001-2008 онд өөрийн хөрөнгөөр нарийвчилсан хайгуулын ажил хийж, 2009 онд Эрдэс баялгийн мэргэжлийн зөвлөлийн хуралдаанаар нөөцийн тайлангаа хэлэлцүүлэн баталгаажуулжээ.

Үүгээр 250.4 сая тонн хүдэр, 66167 тонн молибден, 11.127 тонн алтыг улсын бүртгэлд бүртгүүлсэн юм байна. Харин хайгуулын ажилд тус компани 2.679.400 ам.долларыг зарцуулсан бол нөхөн төлбөрт 714.760 ам.долларыг төрд төлжээ. Мөн тус компанийн Цагаан суваргын ордод оруулсан хөрөнгө оруулалт одоогоор 323.1 сая ам.доллар юм байна. Харин төр өөрийн эзэмшлийн 34 хувьдаа 350.6 сая ам.долларын санхүүжилт хийх юм.

МАК болон Уул уурхайн яамны холбогдох хүмүүсийн тайлбараар Цагаан суваргын орд нь 16 жил ажиллана, энэ хугацаанд 11 их наяд төгрөгийн борлуулалт хийнэ. Улсын төсөвт 4 их наяд төгрөгийн татвар төвлөрүүлэхээс тал нь рояльтын татвараар орж ирнэ. Харин хөрөнгө оруулалтын зардлаа 6.6 жилд нөхнө гэсэн тооцоог тус, тус гаргасан юм байна.

Үүний дараа УИХ-ын гишүүд саналаа илэрхийлэх үеэр “Уул уурхайн сайд та ийм эрсдэлтэй төсөлд халааснаасаа 350.6 сая ам.доллар гаргах байсан уу. Нэг их ашигтай төсөл биш учраас тогтоолыг хэлэлцэх асуудлыг хойшлуулж болдоггүй юм уу” гэх байр суурийг илэрхийлж байлаа. Мөн МАК –ийн зүгээс төслийг хэрэгжүүлэх талд яаравчлахгүй байгааг харгалзан үзэн ёстой гэж хэлж байсан юм.