Өчигдөр АН-нынхан ҮХААЯ-ны сайдаа тодруулах гэж халуухан юм болж. Угаасаа Х.Баттулгыг өргөдлөө өгсөн өдрөөс л эхлээд ҮХААЯ-ны сайдын төлөөх марафон эрчимтэй өрнөжээ. Энэ намынхан сайд болохын төлөө ил, далд янз бүрийн хэлбэрээр тэмцэл өрнүүлээд байсан тул МоАХ-ныхан зарчимын санал гаргажээ. Тэд энэ яамны суудал манай бүлэглэлд ногдох учиртай. Хэрэв ҮХААЯ-ны сайдын суудлыг өөр бүлэглэлд өгвөл бид МАН-тай хамтарч Засгийн газрыг огцруулах болно гэж Ерөнхий сайдаа шууд рекэтэлжээ.  МоАХ-ныхны гэнэтийн энэ шийдэл Ерөнхий сайд Н.Алтанхуягийг тун эвгүй байдалд оруулжээ. Уг нь Н.Алтанхуяг УИХ-ын гишүүн Д.Ганбатад сайдын суудлын бараа харуулсан учир нөгөөх нь Х.Баттулгынхаа үгэнд орохоо байжээ. Ингээд Н.Алтанхуяг нэг нүүдлээр Баянхонгорын хоёр гишүүнийг дундуур нь хуваачихжээ. Бас Д.Ганбатыг нь Х.Баттулгын эсрэг хөдөлгөжээ. Үр дүнд нь давхар дээлийг дан болгох санал хураалтад Д.Ганбат гишүүн Х.Баттулгыхаа үгэнд ороогүй юм. Одоо Д.Ганбат гэдэг гишүүнийг Ерөнхий сайд ашиглаад хаясан учир тэрээр Х.Баттулга ч үгүй, Н.Алтанхуяг ч үгүй үлджээ. Мэдээж ирэх сонгуульд нэр дэвшиж чадахгүй. Дэвшлээ ч Х.Баттулга хөнгөхөөн хавсарчихаар болов. Үнэндээ Н.Алтанхуяг давхар дээлээ тайлахгүйн тулд сайдын суудлаар "хошигоруулсан" олон хүний нэг нь болжээ.

    Үйл явдал ингэж өрнөсөн учир Н.Алтанхуяг нэг том бүлэглэлээ сөрөг хүчинтэй нийлүүлчихгүйн тулд ҮХААЯ-ны суудлыг МоАХ-ных нь мэдэлд үлдээхээр шийджээ. Тэгээд хэнийг сайд болгохоо өөрөө мэд гээд орхичихжээ. Харин МоАХ-ныхан хуралдаад Ш.Түвдэндоржийгоо санал болгов. АН-ын өөр бүлэглэлийнхэн ч МоАХ-ны мэдлийн сайдын суудалтай нэг их зууралдаагүй ч Ш.Түвдэндоржийг сайд хийж чадахгүй гэж дүгнэцгээжээ. Тэгээд АН-ын гишүүд Ерөнхий сайд Н.Алтанхуягт очиж Ш.Түвдэндоржийг сайд хийчих хүн биш гэх мэтээр ил, далдаар хов зөөжээ. Харин Засгийн тэргүүн өөр сайн хувилбар алга гэж учирлажээ.

    Эх сурвалжийн мэдээлж байгаагаар бол Алтангадас, Зүүний хүчний холбоо, Шонхор гэх мэт бүлэглэлийнхэн Ш.Түвдэндоржийг УИХ дээр унагаж болох юм гэсэн хувилбарыг сонгон ярилцжээ. Тэгээд өчигдөр оройноос эхлэн “Хууль зүйн байнгын хороогоо удирдаж чадахгүй байгаа хүн Монголын хамгийн том салбарыг удирдаж чадах уу? Ш.Түвдэндорж хэдэн удаа Хууль зүйн байнгын хорооны хурлаа удирдахгүй архи ууж алга болсныг нь тоолоорой” гэх мэт хорлонтой мессежүүдийг тарааж эхэллээ.

    Нөхцөл байдал ингэж эргэсэн учир АН-ын бусад бүлэглэлийнхэн МАН-ынхантай нэгдэж чадвал сайдад нэр дэвшигч Ш.Түвдэндоржийг УИХ-аар хэлэлцэх үеэр нь амархаан унагаж магадгүй боллоо.