Сүүлийн үед Авилгатай тэмцэх газар руу чиглэсэн олон нийтийн шүүмжлэл хүчээ авлаа. Ар араасаа гарч байгаа баривчилгаа, буруутай нь нотлогдоогүй байхад хүнийг олон сараар хорьдог байдал хэрээс хэтэрсэн учир нөхцөл байдлыг ингэж хурцатгаж байж магадгүй юм.

Эдгээрээс хамгийн хүчтэй шүүмжлэлийг ярьж яваа хүн бол Гадаад харилцааны сайд Л.Болд юм. Тэрбээр удаа дараа АТГ-ын эсрэг мэдээллийг баримттайгаар олон нийтэд мэдээлж буй. Хамгийн сүүлд л гэхэд тэрбээр тус байгууллагыг нийгмийг айдсаар барьж байсан социализмын үеийн НАХЯ-тай зүйрлэсэн.

Тэрбээр АТГ-ын талаар ярихдаа “Намайг сүүлийн 20 жил АТГ-аас шалгаж байна. Би хувьдаа шалгуулахаас айж эмээдэггүй. Төрийн өндөр албан тушаалтан байнга шалгуулж, хяналтад, хардлагад байх ёстой. Үүнд надад эмзэглэж байгаа зүйл байхгүй. Гагцхүү хүмүүсээс мэдүүлэг авахын тулд хорьж цагдаж, залхааж болохгүй. Мэдүүлэг авчихсан хойноо тэрүүгээр нь буруутгадаг, ялладаг. Иргэдийг ийм айдас, түгшүүртэй байдалд байлгаж болохгүй. Урьдчилан хорих төвд хоригдож байсан Газрын тосны газрын дарга асан Д.Амарсайхан эмнэлэгийн туслалцаа авч чадалгүйгээр хорвоог орхисон. Энэ эмгэнэлт явдал, үүний дараах нийгмийн хариу үйлдэл, хууль цагдаагийнхны хандлагыг харахад арай л дэндүү байна. Салах ёс гүйцэтгэсэн өдөр нь байна уу, маргааш нь шүүх хурал нь болж байх жишээтэй. Би шоронд хүн амиа алдлаа. Яаж хүний амь эрсдэхгүй, хүний эрх зөрчигдөхгүй байлгах вэ гэж асуухад албаны хүмүүс “Талийгаач өглөө ахтайгаа инээж, ханиагаад л уулзсан шүү дээ” гэж хариулсан. Юу гэсэн үг вэ. Олон сараар хоригдсон хүн ах дүүсээ хараад баярлахгүй яадаг юм. Тэдний асуудалд хандаж байгаагаас үзэхэд ойлголтын, философийн асар их зөрүү харагдаад байгаа юм. Хүн зүгээр байж байгаад үхнэ гэж байхгүй. Манай нэг УИХ-ын гишүүн надад “Би талийгаачтай хамт ажиллаж байсан, гэмгүй найз явсан. Ажил явдал дээр нь очмоор л байна. Даанч хардагдчих юм болов уу” гэж хэлсэн. УИХ-ын гишүүн хүн ийм айдастай байхаар жирийн иргэд ямар байх нь ойлгомжтой. Би үнэхээр цочирдсон. Миний нэг танилыг хэвтэрт байхад нь АТГ-аас утасдаад ир гэж тушаасан байгаа юм. Тэгээд дөрвөн давхар уу гарахдаа жолооч болон хүүгээрээ түшүүлээд гарсан байна лээ. Гэтэл АТГ-ынханы өгч байгаа тайлбар нь манайх хоёр давхар байдаг гэж байгаа юм. Би давхрын тухайд маргах гээгүй. Шалгах явцдаа тухайн хүн нь өвчтэй байвал ирээд асууж тодруулж болдоггүй юм уу гэж байгаа юм. Тэр бүх зардлыг нь тооцоод цалин мөнгө, унаа тэрэгнийх нь зардлыг өгч байгаа шүү дээ. Битгий шалга гэж байгаа юм биш. Чухам шалгахдаа хүнээ боддог баймаар байна” гэж ярьжээ.

Тэрбээр мөн АТГ-ыг нийгэмд байгаа авлигыг ил болгодог муу муухайг нь ойлгуулж хор уршгийг нь дэлгэдэг болгохын тулд байгуулсан. Анх энэ байгууллагыг байгуулах санаачлагыг гаргасан гишүүд дунд миний нэр яваа. Гэтэл хуучны НАХЯ шиг газар бий болчихлоо. Энэ бол бидний бодож, санаж байсан байгууллага биш гэж ярьж байгаа юм.