"Ерөнхий сайдын 30 минут" уулзалт боллоо. Энэ үеэр Ерөнхий сайд Эдийн засгийн идэвхжүүлэх 100 хоногийн хүрээнд хийж буй ажлуудынхаа талаар танилцуулав. Өнөөдрийн байдлаар 100 хоногоос 20 хоног нь өнгөрөөд байна. Энэ хугацаанд хийхээр төлөвлөсөн 70 ажлаасаа нилээдийг амжуулсан гэж  Ерөнхий сайд хэллээ.

Тухайлбал хэд, хэдэн хуулийг УИХ-д хэлэлцүүлэхээр өргөн барьсан байна. Түүний дотор НӨАТ-ын босгыг нэмэгдүүлэхээс эхлээд чухал хуулийн төслүүд олон байгаа аж. Эдийн засгийг идэвхжүүлэх ажлын хүрээнд импортыг орлож, экспортыг нэмэгдүүлэх төслүүдэд Чингис бондоос санхүүжилт өгч байгаа аж. Түүнчлэн жилд нэг сая тонн цемент үйлдвэрлэх бүрэн хүчин чадалтай Хөтөлийн цементийн үйлдвэрт хөрөнгө оруулалт хийж саяхан ашиглалтанд оруулсан гэж Ерөнхий сайд хэллээ. Хөтөлийн цементийн үйлдвэр ашиглалтад орсноор нийт цементийн хэрэгцээнийхээ 50 хувийг дангаар нь тус үйлдвэрээс авах боломж нээгдэж байгаа аж. Манай улс жилдээ 2 сая тонн цемент хэрэглэдэг. Цаашид энэ тоо өсөх хандлагатай байгаа. Тиймээс цементийн гурван үйлдвэрийг ашиглалтад оруулахаар болжээ. Дээрх гурван үйлдвэрийн хоёр нь Дорноговь аймагт босох бол үлдсэн нь Баян-Өлгийд нээгдэх юм. Бүтээн босголтын ажил нь эхэлчихсэн явж  байгаа аж.

Ерөнхий сайд хэлэхдээ дээрх үйлдвэрүүд ашиглалтад орсноор нэг жилийн дараа гэхэд манай улс нэг шуудай цемент ч гаднаас импортоор авахгүй болох гэнэ. Мөн дуслийн шингэний үйлдвэрлэлд ч Засгийн газраас санхүүжилт өгнэ гэв.

Бензиний үнэ нэмэгдэнэ гэсэн мэдээллийг өчигдөр Газрын тосны газрын дарга Өлзийнбүрэн олон нийтэд мэдэгдсэн. Энэ талаар Ерөнхий сайд хэлэхдээ "Цаашид бензиний үнэ өсөхгүй. Сая би ОХУ-д айлчлаад ирсэн. Энэ үеэр Роснефть болон Ник компанийн хооронд таван жилийн хугацаатай ашигтай гэрээ хийгдсэн. Тэгэхээр ойрын таван жилдээ манай улс безинд санаа зоволтгүй. Энэ гэрээ хийгдсэнээр манай улс жилдээ 100 сая долларыг дотооддоо авч үлдэх байх боломжтой болсон" гэсэн юм.

Тэрбээр ОХУ-д хийсэн айлчлалыхаа талаар үргэлжлүүлэн ярихдаа "ОХУ-ын Ерөнхийлөгч В.Путинтай гурван чухал асуудлыг хэлэлцсэн. Нэгдүгээрт хоёр орны хоорондын дунд хугацааны стратегийн түншлэлийг эхлүүлэх ажлыг ярилцсан. Энэ нь удахгүй ажил хэрэг болно. Хоёр орны хооронд хийгдэх ажлууд л гэсэн үг шүү дээ. Мөн БНХАУ болон ОХУ-ын хооронд тавигдах байгалийн хийн хоолойг Монголоор дамжуулах саналыг Оросын талаас тавьсан. Уг ажилд нь Монголын засгийн газар тусалж бүхий л зүйлээр дэмжиж ажиллана гэдгээ илэрхийлсэн. Баян-Өлгийгөөр дайруулж тавина гэж ярилцсан байгаа. Манай Ерөнхийлөгч Ц.Элбэгдорж, ОХУ-ын Ерөнхийлөгч В.Путиныг Халх голын ялалтын ойд хүрэлцэн ирэхийг урьсан. Тэрбээр амжвал ирнэ гэдгээ илэрхийлсэн. Бас нэг ярилцсан асуудал нь хоёр орны иргэд харилцан визгүй зорчих яриа байсан. Үүнийг ойрын хугацаанд шийдвэрлэхээр болсон" гэлээ.

Эдийн засгийн идэвхжүүлэх 100 хоногийн хугацаанд хувийн хэвшлийнхныг дэмжиж ажиллана гэдгээ Ерөнхий сайд Н.Алтанхуяг хэллээ. Тэгэхийн тулд төрийн дарамт, шалгалтаар дарамтлахгүй, шоронгоор айлгахгүй байх ёстой гэв.

Ер нь энэ хугацаанд бүгдээрээ хамтарч ажиллаж байж хүнд үеийг даван туулна. Энэ 100 хоногийг зарим хүмүүс үхлийн тоолуур мэтээр ярьж байна. Тийм биш. Бид энэ хугацаанд улс төржихгүйгээр хамтарч бүтээн байгуулалтыг хийх ёстой. Түүнээс биш эдийн засгийг өндийлгөж чадахгүй байна гээд баярлаад алгаа ташаад суугаад байж болохгүй. Ер нь хуруу нэмэхээс хошуу нэмсэн дээр гэдэг ардын сайхан үг байдаг шүү дээ. Эдийн засаг нэг өдөр муудсан юм биш. Тэгэхдээ эдийн засгийг хэн муудуулсан гэдгийг яриад улс төржөөд суугаад байх цаг биш хэмээн Ерөнхий сайд ярилаа.