УИХ-ын гишүүн Ш.Түвдэндоржоос зарим зүйлийг тодрууллаа.

-АН-ын Гүйтгэх зөвлөлөөс таныг Үйлдвэр, хөдөө аж ахуйн сайдаар томилохоор нэр дэвшүүлсэн. Гүйцэтгэх зөвлөлийн шийдвэрийг дагах уу?

-Улс төрийн намуудын зорилго бол өөрийнхөө бодлогыг хэрэгжүүлэх шүү дээ. АН-ын төлөө явж ирсэн гишүүний хувьд Засгийн газрын мөрийн хөтөлбөрийг хэрэгжүүлэхэд чадлаараа оролцох ёстой.

-УИХ-ын гишүүн Засгийн газрын гишүүний ажлыг давхар хаших нь хэр зохистой вэ. Х.Баттулга гишүүний хувьд давхар албан тушаал хашихгүй байхаар сайдаасаа огцорсон зүйл бий?

-Би Хууль зүйн байнгын хорооны дарга, хуульч хүн. Одоо байгаа эрх зүйн орчноор УИХ-ын гишүүн Засгийн газрын гишүүний ажлыг давхар хашиж болох хуулийн заалттай. Ерөнхийлөгч өргөн барьсан хуулиар 2014 оны долоодугаар сарын 1-ээс УИХ-ын гишүүн Засгийн газрын гишүүнээр ажиллахгүй байхаар намуудын санал гарсан. Гэвч энэ хууль унасан. Харин хууль тогтоох, гүйцэтгэх засаглалыг тусад нь байлгах гэсэнтэй санал нэг байгаа. Үүнийг дэмждэг. Ер нь бол хэний нэрийг дэвшүүлэх нь Ерөнхий сайдын бүрэн эрхийн асуудал. Гэхдээ фракцийн тухай ойлголт байгаа боловч энэ асуудал Монгол Улсын Ерөнхий сайдын бүрэн эрхийн хүрээнд хэрэгжиж байгаа зүйл.

-Та давхар албан тушаал хашихад бэлэн байна уу?

-Гүйцэтгэх зөвлөл миний нэрийг дэвшүүлж, энэ ажлыг хийж чадна гэж үзсэн. Тийм учраас надад үгүй гэж хэлэх эрх байхгүй.

-Та сайд болбол Үйлдвэр, хөдөө аж ахуйн салбар ямар ажлуудыг хийх вэ?

- Газар тариалан, мал аж ахуйн чиглэлийг одоогийн байдлаас нь дордуулахгүй. "Атрын III" аян ч юм уу, мал аж ахуйн өсөлт харагдаж байгаа бүх зүйлийг залгуулаад явна. Хамгийн гол нь аж үйлдвэрлэл зогсонги байгаа. Энэ салбарт илүү ажил хийх бодолтой байгаа.