МАН-ын бүлгээс Эдийн засгийн хөгжлийн сайд Н.Батбаярыг огцруулах саналыг УИХ-ын даргад дөнгөж сая өргөн барьсан. Энэ талаар УИХ дахь МАН-ын бүлгийн дарга С.Бямбацогтоос зарим зүйлийг тодрууллаа.

- Н.Батбаяр сайдыг огцруулах болсон үндэслэлээ хэлнэ үү?

- Огцруулах үндэслэлийн талаар удаа дараа ярьж байсан. Монгол улсын төсвийн тогтвортой байдлын тухай хууль, Хөгжлийн банкны хууль гэх мэт олон хуулийг зөрчсөн гэж үзэж байгаа. Мөн Монгол улсын үндэсний аюулгүй байдлын зөвлөлөөс үндэсний аюулгүй байдлын зөвлөмжийг зөрчсөн байна гэдгийг хөндөж байгаа. Ер нь заавал хууль дүрэм гэлтгүйгээр бид өдөр бүр эдийн засаг хүндэрч байгааг харж байна. "Оюутолгой" компани 300 ажилтнаа цомхотголоо, "Изинис" компани дампуурлаа. "АПУ" компани ажилчдынхаа цалинг 50 хувиар буурууллаа гэх мэт мэдээллийг байнга сонсож байгаа шүү дээ. Иргэд талхийг таллаж авдаг болсон байна. Махыг грамлаж авдаг бүр нохойнд өгдөг жижиглэнг авч идэж байна. Гадны хөрөнгө оруулалт буурлаа. Монгол улсын зээлжих зэрэглэл долоо хоногт тутамд буурч байна. Эдийн засаг хямралын байдалд орж байна. Ингээд ирэхээр чинь Эдийн засгийн хөгжлийн яам чинь эдийн засгийн хямралын яам болчихоод байна.

- Хариуцлагагүй ажилласан албан тушаалтнууддаа хариуцлага тооцохыг Ерөнхий сайд Н.Алтанхуягаас шаардсан. Шаардлагыг хүлээж аваагүйг та бүхэн юу гэж харж байгаа вэ?

- Бид энэ талаар Ерөнхий сайдад шаардлага хүргүүлсэн. Энэ хүн Монгол улсынхаа эрх ашгийг бодохгүй байна. Тиймээс монголчуудынхаа өмнөөс ард иргэдийн амьдралыг доройтуулж байгаа сайдыг огцруулъя гэж бүлэг үзэж байна.

- Н.Батбаяр сайдыг огцруулах саналыг өмнө нь тавьж байсан. Харин АН-ын бүлэг олонхоороо аваад үлдсэн. Энэ удаа тэгэх байх гэсэн хардлага байна уу?

- Бүх зүйл сайхан байна. Муу зүйл битгий ярь. Монгол улсаа галзуу хөгжүүлж байгаа гэж ярьдаг байсан. Бодит байдал дээр хүн бүрт ногдох зээлийн хэмжээ нэмэгдээд ядуурал газар авснаас биш эдийн засаг өсөөд байгаа зүйл алга. Дээрээс нь валютын ханш өсч, бараа бүтээгдэхүүний үнэ тэнгэрт хадаж байна. Энэ үед ард түмний төлөөлөл болсон УИХ-ын гишүүд маань ямар шийдвэр гаргахыг харъя даа.

- АН-ын Гүйцэтгэх зөвлөлөөс Ш.Түвдэндоржийг ҮХАА-н дараагийн сайдаар тодрууллаа. Дахин "Давхар дээл"-тэй гишүүн ороод ирлээ гэдэг шүүмжлэл байна. Та үүнд ямар байр суурьтай байгаа вэ?

- Эрх баригчид л бодлогоор оруулж ирж байна шүү дээ. Ямар учраас оруулж ирсэн юм мэдэхгүй байна. "Давхар дээл"-ийг бид шүүмжилж байсан. Гэхдээ Ш.Түвдэндоржийг сонгох үгүйг УИХ эцэслэн шийдвэрлэнэ.