Үйлдвэр хөдөө аж ахуйн сайд асан Х.Баттулга өнөөгийн төрийн тогтолцоог шүүмжилж, цаашид “давхар дээл”-тэй байж чадах гэдгээ зарлан сайн дураараа сайдынхаа албан тушаалаас  чөлөөлөгдсөн. Тодруулбал, зургаан сарын турш олон нийтийн анхаарлын төвд яригдсан “давхар дээл”-ийг тайлах хуулийн төсөл УИХ-аар дэмжигдээгүй төгссөнд тэрбээр ундууцаж, албан тушаалаасаа татгалзсан билээ. Тэрбээр цаашид ганц УИХ-ын гишүүний ажлаа хийгээд явна.

 “Давхар дээл”-ээсээ татгалзсаны дараа олон нийт түүнийг “шударга хүн”, “улс төрчдөд өөрөөрөө үлгэр дууриалал үзүүллээ”, “Х.Баттулга шиг улсын ажлыг хийж чадах хүн байхгүй” зэргээр магтаж байв.

Харин ганц л хүн Х.Баттулгыг Өмнөд Солонгосын Севол хөлгийн ахмадтай зүйрлэсэн билээ. Тэр хүн нь УИХ-ын гишүүн Ц.Нямдорж. Тэрбээр “Х.Баттулгыг зүгээр нэг "давхар дээл"-ийг тайлах гэж Засгийн газраас гарч байна гэж би бодохгүй байна. Ардчилсан намын сонгуулийн мөрийн хөтөлбөр хэрэгжих боломжгүй болсон мөн эдийн засаг уналтад ороод ирэхээр багаа хаяаад зугатаж байна. Энэ бол Х.Баттулгын чаддаг ажил. 2012 онд Ардчилсан нам Засгийн газраас гарахад Х.Баттулга Н.Алтанхуягаасаа түрүүлээд мэдэгдэл хийх гээд байсан. Харин Н.Алтанхуяг нь хулхидуулахгүй гэж сандраад түрүүлж мэдэгдэл хийж байсан удаатай. Ийм увайгүй нөхрөөс салж байгаад чинь Засгийн газарт баяр хүргэе. Бас Засгаас зайлж байгаад чинь дахин талархал илэрхийлье Х.Баттулга аа” хэмээн хатуухан шүүмжлээд авсан.

Тэгвэл уржигдархан АН-ынхан Х.Баттулгын оронд очих сайдыг тодрууллаа. Ингэхдээ албан тушаалын бялуу хуваах зарчмаар Хууль зүйн байнгын хорооны дарга, УИХ-ын гишүүн Ш.Түвдэндоржийг сонгов. Энэ тохироонд Ерөнхийлөгчийн зөвлөхүүд болох Л.Эрхэмбаяр, Л.Пүрэвсүрэн нарын нэр яригдаж байсан боловч эцэстээ АН-ынхан давхар, давхар дээлтэй хүнийг сонголоо. Уг нь АН дотор С.Одонтуяа гишүүнээс эхлээд олон гишүүн гаднаас сайд тавих ёстой гэсэн байр суурьтай байсан юм. Гэвч Х.Баттулга энэ асуудалд хүчтэй оролцож, өөрийн хүнийг сонгуулж чадав.

Нэг талаар энэ нь эрх баригчид “давхар дээл”-ийг тайлах сонирхолгүй байгааг илтгэж байна.

Нөгөөтэйгүүр Х.Баттулгыг “давхар дээл”-ийг үзэхээ болиод сайдын албан тушаалаасаа чөлөөлөгдсөн гэдэгт нь эргэлзэж эхэллээ. Х.Баттулга үнэхээр тэгэж бодож байсан бол Ш.Түвдэндоржийг сонгохгүй байсан. Тэгэхээр түүний хэлсэн, хийсэн хоёр нь алд дэлэм зөрж байна. Үнэхээр л “давхар дээл”-тэй байхыг эсэргүүцэж байгаа бол яагаад “давхар дээл”-тэй хүнийг өөрийнхөө оронд явуулав. Тэр дахиад л жүжиг тавьж эхэллээ. Хэдэн жилийн өмнө одоогийн Нийгмийн хамгааллын сайд С.Эрдэнийг нийслэлийн АН-ын даргаас унагаж Ш.Түвдэндоржийг оронд нь томилох жүжгийг дэглэсэн гол хүн нь Х.Баттулга. Одоо ч тэрбээр жүжиг найруулах гэж буй нь Ш.Түвдэндоржийн асуудал юм.

Удахгүй УИХ-ын чуулганаар Ш.Түвдэндоржийг ҮХАА-н сайдаар томилох үгүйг эцэслэн шийднэ. Санал хураах мөчид Х.Баттулга Ш.Түвдэндоржийг дэмжиж кноп дарвал түүнийг хуурамч гэж тодорхойлохоос өөр яах билээ. Түүнчлэн хэцүү цагт багаа хаяж зугтдаг гэж Ц.Нямдорж гишүүний хэлсэнчлэн намаг шалбаагт орсон энэ Засгийн газарт өөрийнхөө оронд Ш.Түвдэндоржийг золигт явуулж байна гэж ойлгогдохоор байна. Түүнийг ард түмэн шударга, сайн хүн гэдэг. Үнэхээр шударга, зарчимч уу эсвэл сайн нэрийг өөртөө зүүгээд бусдыгаа урдаа барьж байна уу гэдгийг  санал хураалтын үеэр л харъя даа.