Монгол Улс, АСЕАН болон Зүүн Азийн эдийн засгийн судалгааны хүрээлэн хоорондын яриа хэлэлцээний түншийн уулзалт 5 дугаар сарын 30-нд Индонези Улсын Жакарта хотноо АСЕАН-ы Нарийн бичгийн дарга нарын газарт анх удаа боллоо. АСЕАН болон Зүүн Азийн эдийн засгийн судалгааны хүрээлэн нь “яриа хэлэлцээний түншийн уулзалт” нэртэй Удирдах Зөвлөлийн гишүүдийнхээ өргөтгөсөн хуралдааныг анх удаагаа Монгол Улстай зохион байгуулав.

Яриа хэлэлцээний түншийн уулзалтад Монгол Улсыг төлөөлж Ерөнхийлөгчийн аюулгүй байдал, гадаад бодлогын зөвлөх Л.Пүрэвсүрэн, Монгол Улсаас АСЕАН-ы дэргэд суугаа Байнгын төлөөлөгч Ц.Жамбалдорж, Монгол Улсаас Япон Улсад суугаа Элчин сайд С.Хүрэлбаатар нар, АСЕАН болон Зүүн Азийн эдийн засгийн судалгааны хүрээлэнгээс түүний гишүүн 16 орноос томилогдсон УЗ-ийн гишүүд, АСЕАН-ы Ерөнхий нарийн бичгийн дарга Ле Луонг Мин, Хүрээлэнгийн Гүйцэтгэх захирал Х.Нишимура болон судлаачид, эдийн засагчид оролцов.
Монгол Улсын Ерөнхийлөгч Ц.Элбэгдорж Монгол Улс, АСЕАН болон Зүүн Азийн эдийн засгийн судалгааны хүрээлэн хоорондын яриа хэлэлцээний түншийн анхны уулзалтад амжилт хүсч, Монгол Улс удахгүй  Зүүн Азийн дээд түвшний уулзалтад нэгдэж, улмаар “АСЕАН болон Зүүн Азийн эдийн засгийн судалгааны хүрээлэнгийн гишүүн орон болно гэдэгт итгэл дүүрэн байгаагаа илэрхийлсэн Илгээлт ирүүлснийг ерөнхийлөгчийн зөвлөх Л.Пүрэвсүрэн хуралдаан дээр уншиж танилцуулан, Гүйцэтгэх захирал Х.Нишимурад гардуулав.

Манай төлөөлөгчдийн тэргүүн Ерөнхийлөгчийн аюулгүй байдал, гадаад бодлогын зөвлөх Л.Пүрэвсүрэн яриа хэлэлцээний түншийн уулзалт дээр үг хэлж, Монгол Улсын гадаад бодлогын Ази, Номхон далайн бүс нутаг, ялангуяа Зүүн Ази, болон Зүүн Өмнөд Азийн улс төр, эдийн засгийн интеграцид өргөнөөр оролцоход чиглэсэн зорилт, үйл ажиллагааны талаар танилцууллаа.

Тэрээр Монгол Улс Ази, Номхон далайн бүс нутгийн олон талт хамтын ажиллагааны бүтцүүд тухайлбал, АПЕК-т гишүүнээр элсэх, АСЕАН-ы яриа хэлэлцээний түнш болох, Зүүн Азийн дээд түвшний уулзалтад нэгдэхийн төлөө өндөр эрмэлзэлтэй, идэвхи чармайлт гарган ажиллаж буйг тэмдэглэж, улмаар Зүүн Азийн эдийн засгийн интеграцид тодорхой хувь нэмрээ оруулах, бүс нутгийн орнуудтай эдийн засгийн өргөн, нягт хамтын ажиллагаа хөгжүүлэхийн төлөө байгааг илэрхийлэв.
АСЕАН болон Зүүн Азийн эдийн засгийн судалгааны хүрэлэнгийн Гүйцэтгэх захирал Х.Нишимура хүрээлэнгийнхээ үндсэн зорилго, чиглэл, сүүлийн үеийн үйл ажиллагааны талаар дэлгэрэнгүй танилцуулж, Монгол Улстай бүс нутгийн эрчим хүч, дэд бүтцийн хамтын ажиллагаа зэрэг тодорхой салбар, чиглэлээр хамтран ажиллахын төлөө байгаагаа илэрхийллээ. Тэрээр Монгол Улс, АСЕАН болон Зүүн Азийн эдийн засгийн судалгааны хүрэлэн хоорондын яриа хэлэлцээний түншийн уулзалтыг ийнхүү анх удаа зохион байгуулахад Хүрээлэнгийн УЗ-ийн гишүүд, ялангуяа Японы Засгийн газрын зүгээс онцгой анхаарал тавьж, дэмжсэнд талархал илэрхийлж, Монгол Улсыг Зүүн Азийн дээд түвшний уулзалтад нэгдэх, Хүрээлэнгийн гишүүнээр элсүүлэхэд дэмжиж ажиллахыг гишүүн 16 орныг төлөөлсөн УЗ-ийн гишүүддээ уриалав.

Хуралдаан дээр Япон, Камбож, Энэтхэгийг төлөөлсөн УЗ-ийн гишүүд Монгол Улсыг Хүрээлэнгийн гишүүн болгохыг дэмжсэн үг хэлж байр сууриа тодорхой илэрхийлэв.

АСЕАН болон Зүүн Азийн эдийн засгийн судалгааны хүрээлэнг 2008 онд Зүүн Азийн дээд түвшний уулзалтын тухайн үеийн гишүүн 16  орон санаачилж байгуулсан. Зүүн Азийн дээд түвшний уулзалтад хожим нэгдсэн ОХУ болон АНУ нь энэхүү хүрээлэнгийн гишүүнээр элсээгүй байгаа.

Хүрээлэн нь бүс нутгийн эдийн засгийн хамтын ажиллагааг улам гүнзгийрүүлэх, улс орнуудын эдийн засгийг өргөжүүлэн хөгжүүлэхэд чиглэсэн нарийн судалгаа, үзэл баримтлалын шинж чанартай баримт бичгүүд боловсруулж, гишүүн орнуудынхаа Засгийн газарт мэргэжлийн зөвлөмж өгөхөд үйл ажиллагаагаа чиглүүлдэг.

Монгол Улс, АСЕАН болон Зүүн Азийн эдийн засгийн судалгааны хүрээлэн хоорондын яриа хэлэлцээний түншийн уулзалтыг амжилттай зохион байгуулсан нь манай орон түүний гишүүн болоход төдийгүй улмаар АСЕАН-ы яриа хэлэлцээний түнш болох, АПЕК болон Зүүн Азийн өндөр түвшний уулзалтад нэгдэх зорилтоо урагшлуулахад чухал алхам боллоо.