МАХН-МҮАН "Шударга ёс" эвслийн бүлэг өнөөдөр хуралдаж гурван асуудлыг хэлэлцсэн байна. Тухайлбал Ашигт малтмалын тухай хуулинд нэмэлт өөрчлөлт оруулах тухай хуулийн төслийн анхны хэлэлцүүлгийг хийх гэж байгаатай холбогдуулан  тус бүлгээс ажлын хэсэг гарган ажилласан байна. Тус ажлын хэсэг бүлгийн хуралдаанд хэд, хэдэн санал оруулж ирснийг өнөөдөр хэлэлцжээ. 1997 оны Ашигт малтмалын тухай хуулийн орчинд ажиллахад сургамж авмаар юм юу байгаа, туршлага болж үлдэх зүйл байгаа эсэхийг голлон анхаарах ёстой гэж бүлгийн дарга Н.Батцэрэг хэллээ. Мөн орд газрын үнэлгээтэй холбоотой асуудлуудад анхаарч  ажилласан байна.

Эрүүгийн хуулинд нэмэлт өөрчлөлт оруулах тухай хуулийн төслийн талаар мөн ярилцсан байна. Энэ асуудлаар тус бүлгийн дарга Н.Батцэрэг "Одоогоор хугацаа хэтэрсэн, төлөгдөөгүй  татварын өртэй байгууллага, аж ахуйн нэгжид эрүүгийн хуулийн  санкцтай байгаа. Тэгэхээр энэ хууль нь үүнээс чөлөөлөх эсэх тухай асуудал юм. Гэмт хэргийн тухай хуулийн төсөл орж ирээд яригдаад эхэлчихсэн байгаа учир энэ хуулийн ач холбогдол буурчихсан байгаа. Гэмт хэргийн тухай хуулиар бага зэргийн татварын хугацаа хэтэрсэн өрийг гэмт хэрэг гэж үзэхээргүй, зөрчил гэж үзээд торгуулийн хариуцлага хүлээлгэхээр болчихсон байгаа юм" гэлээ.

Дараа нь Галын аюулгүй байдлын тухай хуулийн шинэчилсэн найруулгын төслийг хэлэлцсэн байна. Тус хуулинд хэд, хэдэн удаа өөрчлөлт оруулсан байдаг аж. Гол хууль нь 1999 онд батлагдсан юм байна. Сүүлийн 10 гаруй жил галын аюул нэмэгдэж байгаа талаар бүлгийн дарга дурдаад Гал түймэртэй тэмцэх газрын даргын мэдээллийг сонссон байна.

Сүүлийн жилүүдэд Улаанбаатар хотын хүн ам ихэсч, байшин барилга ихээр баригдсан. Үүнээс болж галын гэнэтийн аюул гарсан тохиолдолд гал түймэртэй тэмцэх, унтраах, хүний амь нас эрсдэхгүй байх, эд хөрөнгөө галын аюулаас аврах зэрэг үйлдлүүдийг хийхэд галын байгууллагуудад нэлээдгүй хүндрэл гардаг байна. Улаанбаатар хотод баригдаж байгаа барилгын ихэнх нь галын байгууллагуудын санал дүгнэлтийг авалгүйгээр баригдсан байдаг аж. Тиймээс энэ хуулиар үүнийг хэрхэн зохицуулах вэ гэдгийг тус бүлэг ярилцаж  байгаа гэлээ.