УИХ дахь бие даагчдын бүлгийн гишүүд зарим гишүүдтэй хамтарч шинэ бүлэг байгуулах гэж байна гэсэн мэдээлэл өнөөдөр гарсан.Энэ талаар УИХ-ын гишүүн С.Ганбаатараас тодрууллаа.

-Бие даагч гишүүд зарим гишүүдтэй хамтарч шинээр бүлэг байгуулах гэж байгаа гэсэн мэдээлэл гараад байна. Энэ үнэн үү?

-Тийм ээ. Ийм зүйл яригдаж байна. Энэ яриа сарын өмнөөс яригдаж эхэлсэн. Аль ч бүлэгт ард түмний төлөө ажиллах хүсэлтэй гишүүд бий. Гэхдээ тэд бүлгийн шийдвэр гэсэн далбаан дор ажлаа бүрэн хийж чаддаггүй. УИХ-аар хэлэлцэгдэж буй олон асуудалд олон нийтийн эрх ашгаас илүүтэй намынхаа шийдвэрийг дагаж  буй гишүүд байгаа.  Ард түмний төлөө ажиллах хүсэлтэй олон улстөрчид намын бүлгүүдийн наймааны золиос болж байна. Үүнээс болоод зарим гишүүд нийлж албан бус бүлэг байгуулах санал гаргасан юм.

-Тэгэхээр энэ бүлэгт орох хүсэлтэй гишүүд намынхаа бүлгээс гарна гэсэн үг үү?

-Үгүй. Албан бус бүлэгт орсон ч өөрийн нам, эвсэлдээ ажиллаж болно гэж байгаа.

-Тэгэхээр албан бус бүлэг бусад нам эвслийн адил улс төрийн бүх асуудлыг хэлэлцэх үү, тухайлсан асуудалд нэгдэж хамтарч ажиллах уу?

-Бид уул уурхайн баялагтай холбоотой асуудлуудад саналаа нэгтгэж хамтарч ажиллана. Тухайлбал хоёр долоо хоногийн өмнө УИХ-аар хэлэлцэгдэж унасан Газрын тосны тухай хуулийн асуудлаар бид санал нэгтэй байсан ч бүлгээс болж ижил кноп дарж чадаагүй. Тэгэхээр энэ мэтчилэн асуудлуудад хамтарч ажиллах юм. Мөн ард иргэдэд тулгамдаж буй  асуудлуудаар хамтарч ажиллана.

-Одоогоор албан бус бүлэгт орох нийт хэдэн гишүүн байгаа вэ?

- Нийт 10 гишүүн энэ бүлэгт орохоор болсон. Үүнээс гадна таван гишүүнд урилга явуулсан. Мэдээж тухайн нам эвслийн бүлгээс ирэх дарамт, шахалт их учраас бид тэднийгээ хүлээж байна. Дор хаяж 13 гишүүнтэй болбол үйл ажиллагаагаа эхэлнэ.

-Тухайлбал ямар нам эвслээс, хэдэн гишүүн орж байгааг хэлж болох уу?

-Одоохондоо нэрийг нь хэлэх боломжгүй. Эвслийн бүлгээс дөрвөн гишүүн байгаа.