"МАН-ын эсрэг Засгийн газраас явуулах пиар төлөвлөгөө" нэртэй материал олон нийтэд ил болсон. Тус материалд МАН-ын удирдлагуудын эсрэг ямар материалууд бичиж, нийтлэх талаар урьдчилсан төлөвлөгөөг гаргасан байгаа юм. Тэд уг цаасан дээр бэлтгэсэн материалуудаа сонин, телевизээр гаргахаар гэрээ байгуулсан гэж зарим хүмүүс ярьж байгаа. Албан бус эх сурвалжуудын мэдээлж буйгаар тус гэрээг хийхийг Ерөнхий сайд үүрэгдсэн байна. Тодруулбал тэрбээр яамдын төрийн нарийн бичгийн дарга нарыг тус бүр 30 сая төгрөгийг төвлөрүүлэн PR хийлгэхээр нэгэн төрийн бус байгууллагатай гэрээ хийлгэжээ.

Тэгвэл энэ талаар МАН-ын удирдлагууд байр сууриа илэрхийллээ. Тухайлбал, МАН-ын бүлгийн дарга С.Бямбацогт "Сүүлийн үед манай намын гишүүдийн эсрэг чиглэсэн мэдээ материалыг урьдчилан бэлтгэж түүнийгээ гаргуулахын тулд олон сая төгрөгийг хэвлэлүүдэд өгч байгаа гэж сонслоо. Тэр нь үнэн болох нь батлагдаж эхэлсэн. Тухайлбал өчигдөр МАН-ын бүлгийн дарга М.Энхболдыг газрын наймаачин гэсэн нэвтрүүлэг Ийгл телевизээр цацагдсан. Мөн Н.Номтойбаяр гишүүнийг Мунзуй хочит Г.Нямдоржийг суллахаар явж байгаа зэргээр бичсэн. Н.Энхболд дарга энэ асуудлаар шүүхийн байгууллагад хандах гэж байгаа. Энэ мэт увайгүй үйлдэл хийхээ зогсоохыг хүсч байна" гэлээ.