Шинэчлэлийн Засгийн газар 100 хоногт багтаан эдийн засгаа эрчимжүүлнэ гэж амласан. Энэ долоо хоногт 30 хоногтойгоо золгох гэж байгаа ч олигтой шийвэр гаргасан юм алга. 100 хоногт эдийн засгийг эрчимжүүлэхийн тулд Ерөнхий сайд дэргэдээ Эдийн засгийг эрчимжүүлэх зөвлөлийг байгуулсан. Уг зөвлөлийг бизнесмен Б.Бямбасайхан ахлах болсон. Ерөнхий сайд Эдийн засгийн хөгжлийн сайддаа итгэхгүй байгаа учраас дэргэдээ албан бус ийм зөвлөлийг байгуулсан хэрэг. Тэгээд энэ зөвлөл нь амжилттай ажиллавал бизнесмен Б.Бямбасайхныг Эдийн засгийн хөгжлийн сайдаар томилно гэсэн явган яриа газар авах болсон.

    Харамсалтай нь Эдийн засгийг эрчимжүүлэх зөвлөл болоод бизнесмен Б.Бямбасайхны анхны шийдвэр олон хүний сэтгэлийг гонсойлгосон гэж эх сурвалж мэдээллээ. Учир нь эдийн засгийг эрчимжүүлэх зөвлөлийнхөн өнгөрсөн долоо хоногийн хурлаараа "татвар нэхэх замаар төсөвтөө мөнгө төвлөрүүлэх ёстой" гэсэн хэцүүхэн шийдвэр гаргасан сураг гарлаа. Тэр ч бүү хэл татвараа төлж чадахгүй байгаа аж ахуйн нэгжүүдийн арилжааны банкууд дахь дансыг битүүмжилсэн гэсэн мэдээлэл түгж байна. Мөн Эдийн засгийг эрчимжүүлэх зөвлөлийнхөн банкуудыг хөрөнгөө эргэлтэд оруулаач гэсэн хүсэлт гаргасан бололтой. Эдийн засгийг эрчимжүүлэх зөвлөлийнхний гаргасан эдгээр шийдвэрүүд олон бизнес эрхлдэгчдийн дургүйцлийг төрүүлж байгаа сураг гарлаа. Мөнгөтэй бол татвараа хэлүүлэлтгүй төлнө. Мөнгөгүй болоод л чадахгүй байхад шахаж шаардаж, данс хаах нь бизнесийг дампууруулах бодлого, оны төгсгөл болоогүй байхад яагаад ингэж татварын төлөө улайраад байгаа юм бэ гэх мэт яриа ч газар авч эхлэв. Өнгөрсөн жил манай улс "татвар төвлөрүүлэх аян" өрнүүлсэн нь ихээхэн дуулиан бослон. Учир нь сүүлийн жилүүдэд иймэрхүү аян өрнүүлэлгүйгээр бизнес эрхлэгчид татвараа төлөөд байдаг болчихсон юм. Харамсалтай нь өнгөрсөн жил ийм хэмнэлд шилжсэн. Тэгтэл одоо эдийн засгийг эрчимжүүлэх нэрээр татвар хураах асуудлыг эрчимжүүлж байна.

    Уг нь ард түмэн ч, бизнес эрхлэгчид ч Эдийн засгийг эрчимжүүлэх зөвлөлөөс ийм шийдэл хүлээгээгүй л дээ. Зарим нь "манай Б.Бямбасайхнаас иймэрхүү л юм гарна" гэх мэтээр шоолох болсон гэнэ. Учир нь Б.Бямбасайхныг "татварыг нэх" гэж биш гадаадын хөрөнгө оруулалтыг яаж татах вэ? Хөрөнгө оруулалтын ямар таатай орчин бүрдүүлэх вэ? гэдэг дээр уран гоё нүүдэл хийнэ гэж бизнес эрхлэгчид хүлээж байсан юм. Харамсалтай нь тэр хүлээлтийг биелүүлж чадсангүй. Татвар нэхэх, татвар цуглуулах гэсэн ядарсан аргаар ажлаа эхлүүлэв. Ийм санаачилгаар эхлэсэн ажлын үр дүн, бариа ямар байх нь тодорхой. Тиймээс Эдийн засгийн хөгжлийн сайд гэсэн суудал түүний хувьд мөрөөдөл болж үлдэж магадгүй юм. Бас нэгэнт унасан эдийн засгийг босгох гэж байгаад нам даруулаад улс төрийн карераа дуусгах магадлал нь илүү болов.