Монгол Улсаас ОХУ-ын Кызыл хотод суугаа Ерөнхий консул Д.Ганболд ОХУ-ын Бүгд Найрамдах Алтай Улсад, Алтайн хязгаарт тус тус ажиллав.

БН Алтай Улс. Ерөнхий консул Д.Ганболд БН Алтай Улсын Засгийн газрын орлогч дарга Роберт Пальталлертай уулзан, түүнд албан ёсоор консулын патентаа өргөн барив. Уулзалтын үеэр Р.Пальталлер Орос, Монголын сайн хөршийн харилцаа өндөр хэмжээнд хүрч, илүү нягт хамтран ажиллах шаардлагатайг тэмдэглээд, бизнес эрхлэгчид монголын талтай худалдаа хөгжүүлэх байнгын сонирхолтой байдгийг илэрхийлэв. Түүнчлэн Ташанта боомт дээр гаалийн хяналтын төхөөрөмж суурилуулахаар бэлтгэж байгаа, мөн “Алтай-Алтан уулс” олон улсын аялал жуулчлалын маршрут төсөл хэрэгжиж эхэлснийг мэдээлэв.

Ерөнхий консул Д.Ганболд Монгол Улс, БН Алтай Улсын цаашдын харилцан ашигтай хамтын ажиллагаанд найдаж байгаагаа илэрхийлж, манай хоёр улс үр дүнтэй хамтран ажиллаж ирсэн, ирээдүйд ч энэхүү харилцаагаа шинэ түвшинд гаргахын төлөө чармайн ажиллахаа нотлов.

Тэрээр БН Алтай Улсын Эдийн засгийн хөгжил, хөрөнгө оруулалтын сайд А. Алчубаев, Шилжилт хөдөлгөөний албаны дарга В.Ю.Деревягин нартай тус тус уулзаж хөрш бүс нутгуудын хамтын ажиллагааны хэтийн төлвийн талаар, мөн монгол иргэдийн асуудлаар уулзаж, санал солилцов.

Айлчлалын үеэр Ерөнхий консул Д.Ганболд тус улсын Кызыл-озек дэх хорих ангид очиж, тэнд хоригдож байгаа Монгол Улсын иргэн С.Хариполлаг эргэн, түүний өмгөөлөгчтэй биечлэн уулзав.

Алтайн хязгаар. Ерөнхий консул Д.Ганболд Алтайн хязгаарт айлчилж, Алтайн хязгаарын амбан захирагч Александр Карлинтай уулзан, түүнд албан ёсоор консулын патентаа өргөн барив.

Алтайн хязгаарын амбан захирагч А.Карлин эдийн засаг, хүмүүнлэгийн хамтын ажиллагаа, тэр дундаа хоёр улсын иргэдийн эрх, хууль ёсны ашиг сонирхлыг хилийн чанадад хамгаалах ажил онцгой ач холбогдолтой болохыг тэмдэглэв. Тэрээр “Бид олон арван жилийн харилцааны туршлагатай. Сүүлийн жилүүдэд хамтын ажиллагаа илүү олон талтай болж, эрчимжиж байгаа. Гадаад эдийн засгийн харилцаандаа анхаарч байна” гэв. Хамтын ажиллагааны ирээдүйтэй чиглэл бол мал аж ахуйн салбар гэдгийг онцолж, “Алтай-Алтан уулс” олон улсын аялал жуулчлалын маршрутын дагуу Их Алтайгаар дамжуулан Монгол руу жуулчдыг татах өргөн боломж байгааг дурдав. А.Карлин боловсролын салбарт их дээд сургууль, коллежэд оюутан элсүүлэх, боловсролын газруудын харилцааг өргөжүүлэх, багш болон сурагч солилцоог зохион байгуулах сонирхолтой байгаагаа илэрхийлэв.

Ерөнхий консул Д.Ганболд Алтайн хязгаарын аялал жуулчлалын дэд бүтэц, материаллаг баазын хүчин чадлыг өндрөөр үнэлснээ амбан захирагч А.Карлинд мэдэгдээд, аялал жуулчлалын салбарын хамтын ажиллагааг шинэ шатанд гаргах шаардлагатай байгааг хүлээн зөвшөөрөв.

Тэрээр монголын оюутнууд Алтайн хязгаарт дээд боловсрол эзэмшиж, мэргэжилтэй ажилчин болох сонирхолтой байдгийг дурдаад, хязгаарын техникум, коллежид монголын охид, хөвгүүдийг тэтгэлгээр сургахад дэмжлэг үзүүлэхийг хүсэв.  

Айлчлалын үеэр Ерөнхий консул Д.Ганболд ОХУ-ын ГХЯ-ны Барнаул хот дахь төлөөлөгчийн газарт зочилж, хамтын ажиллагааны талаар санал солилцов. Энэ үеэр Алтайн хязгаарын Ховд аймаг дахь төлөөлөгч А.В.Шабанов, Монгол Улсаас Алтайн хязгаарт суух өргөмжит консул А.П.Оличенко нартай уулзав.