Хууль зүйн сайд Х.Тэмүүжингийн хувьд өөрийн хариуцсан салбараас бусад  сэдвээр тэр бүр яриад байдаггүй нэгэн. Тэгвэл тэрбээр энэ удаа Эдийн засгийн асуудлаар үзэл бодлоо илэрхийлсэн байна.

Тэрбээр эдийн засгийн асуудлаар “Эдийн засгийн энэ хүндрэл сүүлийн нэг хоёр жилийн дотор бий болсон зүйл биш. Бид уул уурхайтай холбоотой, гадны хөрөнгө оруулалттай холбоотой таатай жижигхэн “цонх”-н дээрээ үнэхээр тэнэг авирласан. Тэр мөнгөөрөө ирэх эрсдэлийг зохицуулах, баялаг бүтээх, бизнес эрхлэлтийг дэмжих бус нийгмийн халамж руугаа тараагаад дуусгасан. Бүр олж байгаа орлогоосоо ч бус, нэмж зээл аваад тараасан. Тэр зээлийг дарахын тулд өнөөдөр энэ эдийн засгаа шатааж байна. Хоёрдугаарт нь популистууд худлаа эх оронч царайлж олон нийтэд таалагдах гэснийхээ золиосонд эх орноо, бодит эдийн засгаа шатааж дууслаа. Гадны хөрөнгө оруулалтыг хөөлөө. Олон төсөл хөтөлбөр, компанийг зогсоолоо. Эдийн засгийн цус сэлбэлтийг боомилоод хаачихлаа. Боомилчихсон тохиолдолд тэр эдийн засаг үхжих нь ойлгомжтой. Үхжээд ирэхээр нь энэ хэний буруугаас болов гэж үсчих нь зохимжгүй. Тэгэхээр нь оношийг нь зөв тавих ёстой. Улстөржсөн нүдээр хараад байвал онош зөв тавигдахгүй. Асуудал тулгарахад шийддэг гурван арга байдаг. Нэгдүгээр Герман маягийн арга гэж байна. Асуудал юу байна гэдгийг хараад, юунаас болов гэдгийг нь олоод, асуудлаа шийдчихээд цаашаа явдаг нэг арга байна. Асуудал юу байна, байхгүй гэж баахан хэрэлдэж байснаа “асуудал байхгүй боллоо” гээд пиар хийгээд цаашаа явдаг бас нэг арга байна. Гуравдугаарт энэ асуудал хэнээс болов гэж зодолдож байгаад хэн нэг буруутныг олоод тэрийгээ цаазалчихаад цаашаа явдаг бас нэг арга зам байна. Энэ гурван арга замын алинаар нь явах вэ гэдгийг бидний ухаан л шийднэ" гэсэн байна.