УИХ-ын Хууль зүйн байнгын хорооны өнөөдрийн хуралдаанаар Гэр бүлийн хүчирхийлэлтэй тэмцэх тухай хуулийн төслийн шинэчилсэн найруулгын төслийг хэлэлцлээ. Гишүүдийн олонхи нь тус хуулийн төслийг дэмжих нь зүйтэй гэж үзсэнээр УИХ-ын чуулганаар хэлэлцэхээр боллоо.Гэр бүлийн хүчирхийлэлтэй тэмцэх тухай хуулийг анх 2004 онд УИХ-аас баталж байжээ. Харамсалтай нь тус хууль нь хэрэгждэггүй хуулиудын нэг болж хувирсан байна. Судалгаагаар сүүлийн 3.8 жилийн хугацаанд гэр бүлийн хүчирхийлэлд тооцогдох гэмт хэрэг 1505 бүртгэгдсэнээс 49 иргэн амь насаа алдаж 1180 иргэн гэмтжээ. Мөн цагдаагийн байгууллагад бүртгэгдээгүй болон захиргааны зөрчилд тооцогдон арга хэмжээ авагдсан хүчирхийллийн тоо үүнээс даруй 5 дахин их байгааг энэ чиглэлээр үйлчилгээ үзүүлдэг ТББ-ууд гаргасан төдийгүй хууль хэрэгжиж эхэлснээс хойшхи найман жил гаруйн хугацаанд хохирогчийн аюулгүй байдлыг хамгаалах 41 шийдвэрийг шүүх гаргасан ч шийдвэрээс нэг нь ч хэрэгжээгүй юм байна.
Тиймээс гэр бүлийн хүчирхийлэл улам хүндэрч буй нөхцөл байдлыг харгалзан үзэж, хуулийг шинэчлэх шаардлагатай хэмээн үзэж Хууль зүйн яамнаас дээрх төслийг боловсруулжээ. Хуулийн төсөлд үйлчлэх хүрээг өргөтгөж гэрлэгчид, хамтран амьдрагч, гэр бүлийн гишүүн, асран хамгаалагч, хамгаалуулагч, харгалзан дэмжигч, дэмжүүлэгч, тодорхой нөхцөл шалтгааны улмаас тухайн гэр бүлд амьдарч байгаа хүн, тусдаа амьдарч байгаа төрүүлсэн болон үрчлэн авсан хүүхэд, төрсөн болон үрчлэн авсан эцэг, эх, ах, эгч, дүүгээс гадна эхнэр, нөхөр байсан, дундаасаа хүүхэдтэй хүмүүсийг хуулийн хамгаалалтад хамрагдах боломжтой болгосон байна.
Мөн гэр бүлийн хүчирхийллийн дийлэнх тохиолдлыг зөвхөн зөрчлийн хэмжээнд авч үзэж байсныг өөрчилж, гэмт хэрэгт тооцон, ял ногдуулах зохицуулалтыг томъёолж өгсөн юм байна. Гэхдээ хүчирхийлэгч хохирогчид хөнгөн гэмтэл учруулсан уу, хүнд гэмтэл учруулсан уу гэдгээс хамаарч шийтгэл ногдоно. Хөнгөн төрлийнхөд тооцогдвол албадан ажил хийлгэнэ, ингэхдээ долоо хоног хүртэл саатуулах боломжтой. Хэрвээ хохирогчийн биед гэмтэл учруулсан, амь насанд нь халдсан байвал зүйчлэлээрээ ялын хэмжээ нь нэмэгдэх юм байна. Тухайлбал, хүүхдийн биед гэмтэл учруулсан бол 5-8 хүртэл жилээр хоригдож болзошгүй. Хүний амь насыг хохироосон бол түүнээс олон жилээр хоригдох ял ногдуулах аж.
Хохирогчдыг хамгаалах, тэдэнд байнгын хараа хяналт тавьж байхын тулд Гэмт хэргээс урьдчилан сэргийлэх зөвлөлийн дэргэд дэд зөвлөл байгуулан ажиллуулна. Үүнийг ажиллуулахад нэмэлт орон тоо шаардахгүй өнөөгийн хүчин чадлаараа хүндээ хүрч ажиллах боломжтой хэмээн үзжээ.
Хууль зүйн сайд Х.Тэмжүүжиний хэлж буйгаар хүчирхийлэгчийг албадан ажил хөдөлмөр эрхлэх хугацаанд нь ёс зүй хүмүүжлийн хичээл заах зэргээр боловсролын арга хэрэгслийг ашиглаж болно гэж үзэж байна. Ер нь гэр бүлийн хүчирхийлэл гарч байгаа суурь нөхцлийг судалж үзэхэд архи уусан үедээ энэ төрлийн гэмт хэрэг өдүүлэх байдал түгээмэл байгаа тул архины хамаарлаас гаргах эмчилгээнд явуулж дахин гэр бүлийн хүчирхийлэл үйлдэхгүй байх талын арга хэмжээ давхар авагдахаар хуулийн төсөлд суусан гэдгийг онцоллоо.
