Жирийн нэг иргэнийг би нэгэн цагт хуурамч бичиг баримт үйлдэж байсан гэж ам нээж, хаа нэгтээ ярилцлага өгсөн байвал манай хууль хяналтынхан яасан шуурхай хүрч үйлчлэх бол оо. Гэтэл УИХ-ын гишүүн би хуурамч бичиг баримт бүрдүүлсэн гэх зүйлийг сайрхаад ч байгаа юм шиг, онгироод ч байгаа юм шиг, хэнэгч үгүй ярьж суухад хууль хяналтынхны хөлөнд дөнгө зүүлгэсэн аятай огт хөдөлгөөнгүй байх юм.

Энэ л байдлаас болж иргэд бухимдаж, хууль хяналтынханд итгэх итгэл нь алдарч байна.

УИХ-ын гишүүн Н.Номтойбаярын нууж, хаадаг зүйлсийн зах зухаас нь иргэд мэддэг болоод удаж байгаа энэ үед ахиад л өөрийнхөө хийсэн хууль бус үйлдлийн талаар ам нээж орхив. Ямар их эрх дархтай, ямар их ил цагаан хүн бэ тэр. Монгол Улсын үндсэн хуулинд хуурамч бичиг баримт бүрдүүлэх, бичиг баримт хуурамчаар үйлдэх зэргийг эрүүгийн хэрэгт тооцдог.

Улмаар хэвлэл мэдээллийн хэрэгсэл, хүмүүсийн дунд яригдаж байх бүхий л зүйлсээс цагдаагийн байгууллага сэжиг бүхий болоод гэмт хэргийн шинжтэй үйлдлүүдийг шалгах бүрэн эрхтэй байдаг. Гэтэл УИХ-ын гишүүн "би хуурамч бичиг баримт бүрдүүлж байсан" гэх зүйл яриад сууж байхад яагаад энэ дагуу шалгаж эхлэхгүй байгаа юм бэ. Аль эсвэл шалгамаар байдаг бас л өнөөх бүрэн эрх нь харшлаад байна уу?. Үгүй бол олон нийтээс нууцаар шалгаад эхэлчихсэн юм уу?

УИХ-ын гишүүн Н.Номтойбаяр бол хууль хяналтынхны хараанд хэд хэдэн удаа өртөж байсан нэгэн. Улмаар зарим хэрэг нь одоо ч  шалгагдаад  явж байгаа гэхэд болно. Гэвч ийн хуулийнхны хяналтанд байгаа төдийгүй ард иргэдийг төлөөлж УИХ-д суусан хүн өдгөө өөрийнхөө гэмт үйлдэл хийснийг бахархасан аястай яриад сууж байх хэр зөв бэ?. Олон нийтэд үлгэр жишээ болохоо мэдэгдэж, иргэдийн итгэл найдварыг тээж УИХ-д гарч ирчихээд одоо ийм ёс суртахуунгүй зүйл яриад сууж байгааг нь иргэд шүүмжилж эхлээд байгаа юм.

Мөн Н.Номтойбаяртай хамт хутга, шөвөгний хэрэгт холбогдоод буй “Мунзуй” хочит Г.Нямдорж саяхан суллагдсан учир Н.Номтойбаярын эсрэг янз бүрийн зүйл ярих нь тодорхой. Тиймээс эрхэм гишүүн өөрийнхөө булхайг Г.Нямдоржоор илчлүүлж байснаас нэг нэгээр нь өөрөө илчилж байна гэж зарим иргэд ярьж байна.

“Мунзуй” Г.Нямдорж бол хууль хяналтынхны хэд гурван хүний овоо хараанд өртсөн нэгэн байсан бол  одоо бараг Монголын ард түмний танил болж байх шиг байна. Тиймээс тэрбээр дуртай үедээ хэвлэл мэдээллийн хэрэгслээр “анд найз”-ынхаа болчимгүй үйлдлийг гэрчилж, "үзэлцэж" суудаг болоод удаж байгаа билээ.

 Өмнө нь УИХ-ын гишүүн асан Ш.Сайхансамбуу “УИХ-ын танхимд авлига өгч байсан хүнтэйгээ зэрэгцээд сууж байгаадаа их ичдэг болсон” гэж хэнэгч үгүй хэлснийхээ төлөө хууль хяналтынханд дуудагдаж байсан. Мэдээж хуулийнхан хэзээ хэнд авлига өгч, авалцаж байсан гээд л асуух зүйл их байсан байх. Гэтэл Ш.Сайхансамбууг дуурайж байгаа аятай Н.Номтойбаяр хийсэн үйлдлийнхээ талаар ам нээж байхад хууль хяналтынхан яагаад нам жим байна вэ?

Мэдээж Н.Номтойбаяр хуурамч баримт, бичиг бүрдүүлэхдээ тодорхой албан тушаалтан, эрх бүхий хүмүүсээр туслуулсан л байж таараа. Тэгвэл түүний үйлдсэн гээд байгаа энэ хэрэгт ямар албан тушаалтан, ажилтан, хувь хүмүүс холбоотой вэ гэхчлэн шалгах зүйл их байлтай.

Д.Дуулим