Засгийн газрын ээлжит бус хуралдаан өчигдөр болж Төмөр замын царигийн асуудлаар шийдвэр гаргасан байна. Тодруулбал, өмнө нь УИХ-д өргөн бариад, буцааж татсан Төмөр замын царигийн тухай УИХ-ын тогтоолын төслийг хэлэлцээд зарим зүйлд нь нэмэлт өөрчлөлт оруулжээ. Засгийн газраас яг ямар шийдвэр гаргасан нь одоогоор олон нийтэд ил болоогүй ч энэ талаарх мэдээллийг төмөр замын асуудалд идэвхтэй оролцдог УИХ-ын гишүүн Х.Баттулга олж мэдсэн бололтой. Тэрбээр “Өнөөдөр Монгол улсын Засгийн газраас 100 жилийн туухэндээ байгаагүй гутамшигт шийдвэр гаргажээ” хэмээн жиргэжээ. Үүнээс үзвэл Засгийн газар өчигдрийн хуралдаанаараа төмөр замын шинэ шугамыг нарийн царигтай болгосон байж магадгүй гэх хардлагыг олон нийтэд төрүүлж орхив.
Уг тогтоолын төслийг татаж авсны дараа Эдийн засгийн хөгжлийн сайд Н.Батбаяр “Төмөр замын царигт өөрчлөлт оруулахгүй, зөвхөн хилээс цаашхи төмөр замын шугамд бага зэрэг өөрчлөлт оруулах шаардлагатай болсон учраас татаж авч байна" гэх тайлбарыг хэлсэн. Үүгээр бол Хятад хүртэлх замыг нарийн царигтай харин Орос хүртэлхийг өргөн царигтай тавина гэж ойлгож болно. Үүнийг нь ч учир мэдэх хүмүүс "зөв шийдвэр" хэмээн үнэлж байсан билээ. Гэхдээ Х.Баттулгын жиргээ Н.Батбаярыг үнэн хэлсэн эсэхэд эргэлзэхэд хүргэлээ.
Хэрвээ манай улс төмөр замын асуудлаа шийдчихвэл бид нүүрсээ асуудалгүй экспортолдог болохоос гадна эдийн засагт үнэлж барашгүй эерэг үр нөлөө гарах юм. Бид жижиг эрх ашгаас болж уг асуудлаа олон жил гацаасан. Харин энэ удаад яах эсэх нь удахгүй тодорхой болох биз ээ.
Э.Хулан
Сэтгэгдэл (58)