Нэр бүхий хэвлэл мэдээллийн хэрэгслүүд шилдэг агентлаг шалгаруулж өргөмжлөл гардуулсан нь олны шүүмжлэлийг ихээр дагуулах боллоо. Хуулиар хүлээсэн үүргээ л биелүүлж үнэлэгдэх ёстой атал хэвлэл мэдээллээр шилдэгээр цоллуулах нь хэр зохимжтой вэ? гэсэн асуудал үүнийг дагаад босч ирлээ. Тэртусмаа татвар төлөгчдийн мөнгөнөөс 10-15 сая төгрөгийг хэвлэлийн эздэд өгсөн гэх яриа газар авч хүмүүсийг бухимдлыг бүр их төрүүлэх болов. Төсвийн мөнгөөр хэвлэл мэдээлэллийнхэнтэй гэрээ байгуулахгүй гэсэн УИХ-ын шийдвэр гарсан. Харин тэд шилдэг сэтэр зүүхийн тулд ийн мөнгө төлсөн бол хууль зөрчсөн алхам болно. УИХ-ын дарга З.Энхболд “хэрвээ мөнгө төлсөн баримтыг нь аваад ирвэл хариуцлага тооцож болно” гэсэн агуулгатай мэдэгдэл хийсэн билээ. Тэгвэл шударга өрсөлдөөн хэрэглэгчдийн төлөө газрын дарга О.Магнай ч мөн үүнтэй ижил утгатай зүйлийг твиттерээр жиргэлээ. Тэрээр “Шилдэг агентлаг болохын тулд 10-15 сая тегрег егсен нехед хувиасаа эргvvлж телеерэй. Би маргааш Vндэсний Аудитын Газар хандана. Эх оронч бай !” гэж жиргэсэн нь олон хүний анхаарлыг татаад зогсохгүй шилдэг гэх агентлагуудын асуудал нэлээд өндрөө авч маргаан дагуулах шинжтэй байна.