Олон улсын түвшинд Монголын зээлжих зэрэглэл +B ээс -B болтлоо буурахад Эдийн Засгийн хөгжлийн сайд Н.Батбаярын бодлогогүй алхам их нөлөөлсөн гэж ард түмэн үзэх болсон. Тэгвэл Эдийн засгийн хөгжлийн сайд Н.Батбаярын рейтинг журмын нөхөдийнхөө дунд хэрхэн унасныг 24tsag.mn цувралаар хүргэхээр бэлтгэв. Цуврал №1.

Монгол Улсын Ерөнхийлөгч Ц.Элбэгдорж: Тусдаа яам байгууллаа гээд эдийн засаг хөгжсөнгүй

    Ер нь эдийн засгийн хөгжлийн яам байгууллаа гээд энэ эдийн засаг хөгжихгүй байна. Би маш тодорхой байр суурийг Ерөнхий сайдад хэлсэн. Оны өмнөөс л "За Ерөнхий сайд аа, эдийн засгийнхаа хөгжлийг гартаа ав" гэж хэлж байсан. Монголын өнөөдрийн хамгийн том чухал асуудал юу юм гээд ярихад эдийн засгийн хөгжил шүү дээ. Монгол үндэстний эрх ашиг бол хөгжил. Монгол Улс хөгжих хэрэгтэй, монгол иргэн, монгол айл гэр чөмөгжиж хөгжих, бэхжих хэрэгтэй. Эдийн засаг нь өсөж, орлого нь нэмэгдэх ёстой.

    ...Эдийн засагт мундаг зүйл хийсэн хүн л гавьяат эдийн засагч цолыг авдаг байх ёстой л доо. Гавьяат Их Хурлын гишүүн, гавьяат төрийн албан хаагч гэж цол тэмдэг байхгүй. Хүмүүс үүнийг шүүмжилж л байсан. Энэ нь тэр эдийн засаг энэ тэртэй ямар ч холбоогүй зүйл. Тэр гавьяат цол өгөх зарлигт юу гэж бичсэн бэ гэхээр “Ардчилсан Үндсэн хуулийг батлалцахад оруулсан хувь нэмрийг нь үнэлж” гэж бичсэн байдаг.

З.Энхболд: Одоо муу юмаа бодож эхлэх хэрэгтэй болчихлоо

    Нэг ам.долларыг гурван ам.доллар болгож, 1.5 тэрбум ам.доллараар  хийх ажлыг 4.5 тэрбум болгож өсгөх бодлого бүхий зөвлөмжийг 2012 оны арванхоёрдугаар сарын 3-ны өдөр ҮАБЗ-өөс гаргасан. Ингээд арванхоёрдугаар сарын 6-нд мөнгө орж ирсэн. Авах нь тодорхой байсан мөнгийг яаж зарцуулах талаар Засгийн газарт хоёр чиглэл өгсөн. Нэгдүгээрт, өгсөн мөнгө үржигдэж байх ёстой. Хоёрдугаарт, зөвлөмжийн дагуу энэ мөнгөний эхний хэсгийг 2017 онд төлөх графикаа гаргасан, өрийн менежментийн хуулиа батлуулчихсан байх ёстой л доо. Гэтэл энэ Өрийн удирдлагын хуулийн төсөл өчигдөр л өргөн баригдсан. Тэгэхээр энэ өрийг яаж төлөх талаар Засгийн газар одоогоор бодоогүй явж байна. Ийм аюултай юм болчихоод байна. Одоо муу юмаа бодож эхлэх хэрэгтэй болчихлоо. 2017 оны арванхоёрдугаар сарын 6-нд бондын мөнгийг хүүгийн хамт палхийтэл төлөх ёстой. Үүний тулд 2014 оны төсвийн тодотголоос эхлээд өрөнд өгөх мөнгөө нөөцлөх ёстой. Бид хэмнэлтийн горимд шилжихээс өөр аргагүй болно. Гэтэл үүгээр боссон юм гэвэл "Боинг" онгоцноос өөр үзүүлэх юмгүй болчихоод байна. Бондын мөнгөөр боссон бодитой үйлдвэр алга. Бусад нь бүтээн босголтын шатанд явна.


УИХ-ын гишүүн М.Батчимэг: Ажил нь муу сайдаа солих саналаа гаргах хэрэгтэй
   
    Эдийн засаг үнэхээр хүндэрсэн, зарим салбарын ажил ихээхэн уналттайг бид мэдэж байгаа. Ийм байдлаар 2016 он хүртэл цаг нөгцөөх эрх Засгийн газарт байхгүй. Улс төрийн хэт савлагаа, хямрал руу оруулчихалгүйгээр ажил нь явахгүй байгаа сайд нараа солиод явах саналаа заавал гаднаас шахахыг хүлээлгүйгээр Ерөнхий сайд өөрөө гаргах ёстой. Н.Алтанхуяг сайдын Засгийн газрыг АН-ын бүлэг хамгаалж үлдсэн. Одоо Ерөнхий сайдад алдах эрх байхгүй. Танхимаа удирдаж чадаж байгаа бол түүнийгээ харуулах ёстой.

УИХ-ын гишүүн Ж.Батзандан: Н.Батбаяр сайдыг огцруулах нь зөв

    Огцруулах асуудал анх яригдаж байх үед би хамгаалж байсан. Харин энэ удаа хамгаалж чадахгүй. Н.Батбаяр сайд Засгийн эрх авснаас хойш цалин тэтгэвэр, тэтгэмжийг нэмэгдүүлэх талаар ямар ч арга хэмжээ авсангүй, төгрөгийн ам.доллартай харьцах ханш 30 орчим хувиар суларсан. Өргөн хэрэглээний бараа, бүтээгдэхүүний үнэ бодит амьдрал дээр 30 орчим хувь өсөж, улмаар иргэдийн худалдан авах чадвар эрс муудаж, ард иргэдийн амьдралд хүндээр тусаж байна. Чанаргүй зээл 2013 оны 11 дүгээр сарын эцэст 572,5 тэрбум төгрөг болж, өмнөх оны мөн үеийнхээс 274 тэрбум төгрөг буюу 91,8 хувиар өссөн тул огцруулах нь зөв


АН-ын Ерөнхий нарийн бичгийн дарга Ц.Оюундарь: Н.Батбаяр сайд багаар ажиллаж чадахгүй байгаа нь үнэн
   
    Мэдээж Засгийн газар төгс сайн ажиллаж байгаа гэж хэлж чадахгүй. Эдийн засгийн хүндрэлүүд байна. Дээр нь шинээр байгуулагдсан Эдийн засгийн хөгжлийн яам яаж ажиллах арга хэлбэрээ одоо хүртэл сонгоогүй. Энэ нь хөрөнгө оруулагчдын сэтгэлд таагүй санагдаж байгаа нь үнэн. Гэхдээ өнөөдөр хамгийн чухал нь улс орны тогтвортой байдал. Тиймээс болохгүй байгаа сайд нарыг болж байна гэж хамгаалаад байгаа юм биш, тогтвортой байх гэдэг ерөнхий эрх ашгийнхаа үүднээс хамгаалж үлдсэн. Харин энэ нь том сануулга. Тухайн сайд, яам нь үүнээс том сургамж авч ажлаа сайжруулах хэрэгтэй. Н.Батбаяр сайд багаар ажиллаж чадахгүй, харилцаа холбоо муутай, шинжлэх ухаанч бус байгаа нь таатай сайхан харагдахгүй байгаа нь үнэн.

Нийслэлийн Засаг дарга Э.Бат-Үүл: "Чингис" бонд бол Н.Батбаярын мөнгө биш ард түмний хөрөнгө
    Н.Батбаярыг зодоогүй. Харин муудалцсан нь үнэн. "Чингис" бонд Н.Батбаярын мөнгө биш, ард түмний хөрөнгө. Тодорхой төслүүдийн санхүүжилтийг зогсоох эрх түүнд байхгүй. "Гудамж" төслийг аймагт хийх нь ямар ч ашиггүй. Анхнаасаа л хотод хийхээр төлөвлөсөн төсөл.

Нийтлэлч Баабар: Дээд тэнгэртэй холбоотой байх
    ... 2014 оны төсөвт долларыг 1384 төгрөг байхаар бодож тооцоолсон нь үнэхээр гайхмаар. Үүнийг Эдийн засгийн яам бодож олсон гэх авч чухам яаж тооцоолсноо улсын төсөв хэлэлцэж байхад тас нуугаад хэлээгүй. Бодвол дээд тэнгэртэй холбоотой байх.
   
    ... Гаднаас Чингис, Самурай мэтийн бондын зээл дахиж олдох магадлал тун бага. Зээлжих зэрэглэл буурч хүү нь 9 хувь хүрчихээд байна шүү дээ. Барьцаанд нь юугаа тавих билээ? Сангийн яамыг цуглуулдаг, үрдэг хоёр яам болгож салган хуваасны дүнд сайхан ч наргилаа даа. Сая Засгийн газраас 888 төсөлд (тэнгэрээс мэссэжээр ирсэн тоо юм гэсэн) 800 сая доллар гаргаж жижиг дунд үйлдвэрлэгчдэд зээлээр тараах боллоо. Уг санаа нь их сайхан, энэ мөнгөөр үйлдвэрлэгчид маань экспортын бүтээгдэхүүн үйлдэрлэж бүтээгдэхүүнээ гадагш нь гаргах юм байна. Юу үйлдвэрлээд хэнд зарах гээд байгаа, хэн юу авах гээд байгаа юм, бүү мэд. Ер нь иймэрхүү арга хэмжээ луйврын гараар дамжаад алга болдог өргөн баялаг туршлагатай улс билээ, бид.

Зам тээврийн яам: Сайд тун хариуцлагагүй мэдэгдэл хийлээ
    Засгийн газраас нэн яаралтай хэлэлцүүлэхээр өргөн барьсан Эдийн засгийг эрчимжүүлэх зарим арга хэмжээний тухай УИХ-ын тогтоолын төслийг Эдийн засгийн байнгын хороогоор хэлэлцэх үеэр Эдийн засгийн хөгжлийн сайд Н.Батбаяр "Төмөр зам барихад зориулж “Чингис” бондоос 450 сая ам.доллар гаргасан. Газар шорооны ажил нь хийгдэж байгаа гэдэг. Өнөөдөр эдийн засаг хүнд байгаа нь экспортод гаргах уул уурхайн бүтээгдэхүүнээ тээвэрлэх төмөр замаа барьж чадаагүйтэй холбоотой хэмээн Засгийн газрын гишүүний хувьд тун хариуцлагагүй мэдэгдэл хийлээ.
    ...ЭЗХЯ, Хөгжлийн банк мөнгөгүй болсон гэдэг шалтгаанаар санхүүжилт хийхгүй байгаа атлаа Эдийн засгийн хөгжлийн сайд нь УИХ дахь Эдийн засгийн байнгын хорооны хуралдаан дээр төмөр зам барихад зориулж 450 сая ам.доллар өгсөн мэтээр худал мэдээлэл хийснийг эрс няцааж байна.

"Өнөөдөр" сонин /2014.05.01/