Монгол Улсын Ерөнхийлөгч Ц.Элбэгдорж үйлдвэр хөдөө аж ахуйн сайдад Ш.Түвдэндоржийн нэрийг дэвшүүлснийг дэмжихгүй гэдгээ илэрхийлж “энэ томилгооноос эхлээд зөв жишиг тогтооё, давхар дээлээ тайлья” гэдэг хариултыг Ерөнхий Н.Алтанхуягт илгээсэн билээ. Харин АН-ын бүлэг хуралдаж Ерөнхийлөгчийн энэхүү санаачлагыг дагахгүй гэж мэдэгдсэн нь улстөрийн хүрээнд багагүй ярианы сэдэв болоод байна. АН-ынхан Ерөнхийлөгчийн санаачлагыг сөрж байгаа нь анхны үйлдэл биш. Тэд өмнө Ерөнхийлөгчийн санаачилсан “шилэн дансны тухай” хуулийг буцааж “давхар дээлийг тайлах” хуулийг эцсийн хэлэлцүүлгээс нь унагасан. Түүгээр ч үл барам нэмж төрийн өмчит компани байгуулахыг хориглосон тогтоолын төсөл санаачилсан яг тэр өдөр шинээр төрийн өмчийн даатгалын компани байгуулах шийдвэрийг гаргасан. Эдийн засгийн хөгжлийн яамны сайд Н.Батбаярт хариуцлага тооцож Ерөнхий сайд өөрөө эдийн засгийн эрх мэдлээ гартаа ав гэдэг саналыг ч Ерөнхийлөгч хэлээд байгаа. Гэвч түүний хэлсэн үгийг АН-ынхан нэг л тоомжиргүй хүлээж авч байгаа нь удтал тэвчиж суусан Ерөнхийлөгчийг хөдлөхөд хүргэсэн бололтой. Тэр үргэлж Засгийн газрыг тогтвортой ажиллуулахын төлөө хамгаалж ирсэн. Харин хариуд нь эрх баригчид түүнийг удахгүй суудлаасаа буух хүн гэж үзэн улам басамжлах өнгө аястай болоод байна. Энэ нь АН-ын нэр хүндийг ганц тахалж байгаа Ерөнхийлөгчийг өөрийн эрхгүй тэдэнд чанга нударга үзүүлэхэд хүргэж болзошгүй боллоо.

    Нүүр өгөх тусам бөгс харуулаад байвал Ерөнхийлөгч зангарагаа харуулна шүү гэдгээ илэрхийлж эхэллээ. Үүнийг бататгасан ярилцлагыг түүний олон нийтийн харилцааны бодлогын зөвлөх А.Ганбаатар хэвлэлд өгсөн ярилцлагадаа онцолсон байна.

    Тэрээр “УИХ-аар Ерөнхийлөгчийн “Давхар дээл” тайлуулах тухай хуулийг унагасан. Шилэн дансны тухай хуулийн төслийг буцаасан. Ш.Түвдэндоржийг сайдаар томилохоос татгалзах асуудал дээр УИХ дахь Ардчилсан намын бүлэг дахиад эсрэг байр суурь илэрхийллээ. Өөрөөр хэлбэл, “давхар дээл”-ийг дэмжинэ гэлээ. Энэ нь Ерөнхийлөгчийн том бодлого, үйл ажиллагааны эсрэг, зөвхөн өөрсдийн болоод фракциудын хувийн жижиг, явцуу эрх ашиг, суудлын төлөө хийж байгаа өрөвдөлтэй ажил юм.” гэж эрх баригчдын үйлдэлд дүгнэлт өглөө.

    Тэр ч бүү хэл Д.Зоригт, Г.Батхүү болон нэр бүхий зарим гишүүд өрөөндөө нийлж сархад задлангаа “буух Ерөнхийлөгчтэй юугаа ярих вэ дээ” гэсэн яриа өрнүүлж, тийм мессежийг зориуд зохион байгуулалттайгаар тарааж байна гэдгийг пал хийтэл дэлгэж орхив. “Монгол Улсын Ерөнхийлөгч Ц.Элбэгдорж бол өмнө нь удаа дараа өндөр албан тушаалд сууж үзсэн, түүнийгээ өгч ч чаддаг улстөрч. Суудалтай, суудалгүйгээсээ хамааралгүйгээр нөлөө ихтэй байдаг тийм л улстөрч. Үүнийг зарим хүн мартаад байх шиг байгаа юм. Ерөнхийлөгч бол Засгийн газрыг тогтвортой байлгахын төлөө явдаг. Түүнийхээ төлөө ч олон тодорхой алхам хийлээ шүү дээ. Энэ нь бүх хүнд тодорхой байгаа. Гэтэл зарим хариуцлага тооцох ёстой хүндээ Засгийн газар хариуцлага тооцож чадахгүйгээр үл барам Ерөнхийлөгчийн эсрэг ил далд хуйвалдаан хийж байгааг учир мэдэх хүмүүс бүгд гадарлаад эхэлчихсэн. Засаг өөрөө өөрийгөө л оролдож байна шүү дээ” гэж хэлсэн нь анхаарахгүй орхиж болохгүй сануулгыг эрх баригчдад илгээсэн явдал боллоо.

    Цаашлаад  “Ш.Түвдэндорж гэдэг хүнийг дэмжээрэй гэж хувьдаа аж ахуйтай гишүүдийг дарамталсан байх юм. “Танайх зээл хөөцөлдөж байгаа юм байна. Эхлээд чи Ш.Түвдэндоржийг дэмжчих. Фортунаг аваад үлдчих. Тэгсний чинь дараа шийдэж өгнө” гэсэн байна. Аж ахуйтай гишүүдийн кнопыг үнэлж, аж ахуйгаар нь уядаг байдал хавтгайрч газар авсан байна” гэж тэдний юу хийж, ямар балаг хутгаж байгааг шулуухан мэдэгдлээ.

    Ийнхүү төрийн тэргүүн Ц.Элбэгдорж “тэвчинэ, тэвчинэ гэхэд арай дэндэж байна шүү” гэсэн мессежийг эрх баригчдад өгч, өөрөө өөрсдийгөө битгий оролдоорой гэдгийг санууллаа. Харин түүний хэлсэн үгийг зөрсөн чигээрээ шаварт шигдэх үү, тусгаж аваад цаашаа урагшлах уу гэдгийг АН-ынхан шийдэх л үлдлээ.