УИХ-ын чуулганы хуралдаан нилээн ширүүн уур амьсгалтай үргэлжилж байна. Хуралдаанаар Монгол Улсын эдийн засаг, нийгмийг 2013 онд хөгжүүлэх Үндсэн чиглэлийн биелэлтийг үргэлжлүүлэн хэлэлцэж байна. Хэлэлцэж буй асуудалтай холбоотой гишүүдийн асуулт хариулт үргэлжилж байна.

МАН-ын бүлгийн гишүүд Засгийн газрын өнгөрсөн хоёр жилийн үйл ажиллагааг хангалтгүй байсан гэж дүгнэв. Энэ хугацаанд эдийн засгийн үзүүлэлтүүд буурсан, ард түмний амьдрал хүндэрсэн, бодитой ажлууд хийгдээгүй гэсэн хатуухан шүүмжлэлүүдийг тус намын зүгээс Ерөнхий сайдад хандан хэллээ.

Харин УИХ-ын гишүүн А.Ганбат “МАН-ынхан та нар өнгөрсөн 10 гаруй жил Засаг барихдаа бодитой ямар ажлуудыг хийсэн юм. Ард түмэн та бүхэнтэй хариуцлага тооцсон. Харин хүн нэг бүртэй хариуцлага тооцож чадахгүй байна. Тэдгээр хүмүүстэй хариуцлага тооцох хэрэгтэй. Өөрсдөө хийж гавьсан ажилгүй байж одоо бусдыг битгий шүүмжил. Тухайлбал Баянхонгор аймагт сургууль, цэцэрлэг, эмнэлэг маш их хэрэгтэй байсан. Тийм байхад сургууль, цэцэрлэгийг та нар барьсан юм уу. Харин бид нэг жилийн дотор шинэ сумыг бариад өглөө” гэв.

 Мөн УИХ-ын гишүүн Г.Баярсайхан “Шинэчлэлийн Засгийн газрын ажлыг дүгнэхдээ учиртай дүгнэмээр байна. Бүх зүйлийг хараар дүгнэмээргүй байна. Валютын ханш өссөн гэж МАН-ынхан хэлж байна. Ямар эдийн засгийг бидэнд хүлээлгэж өгснөө МАН-ынхан санах хэрэгтэй. 1.5 тэрбум долларыг баруун солгойгүй цацсан. Төмөр замын мөнгийг үрээд хаячихсан л байсан шүү дээ. Энэ Засгийн газарт хийж буй дэвшилттэй зүйлүүд байгаа. Тэгэхээр Өрийн удирдлагын тухай хууль болон Ашигт малтмалын тухай хуулиндаа анхаарал хандуулаад нэгдсэн санаа бодолтой оролцмоор байна” гэв.

Харин Д.Оюунхорол “ Бид  Засгийн газрын 2013 оны үйл ажиллагаанд үнэлэлт, дүгнэлт өгч байна. МАН-ынхан бүх зүйлийг муу, муухай болгож харлуулах гээгүй юм. Бид өсөлттэй эдийн засгийг Шинэчлэлийн Засгийн газарт хүлээлгэж өгсөн. Эдийн засгийг зөв бодлоготойгоор явуулж чадахгүй байгааг бид шүүмжилж байна. Үндэсний Аудитын газар хүртэл үүнийг баталж өгсөн. 2013 оны нийгэм, эдийн засгийн үндсэн биелэлтийг 59  хувьтай байгаа гэж аудитын газраас дүгнэсэн. Үндсэн чиглэлийн зорилт арга хэмжээг сайн зохион байгуулаагүйгээс болж Эдийн засаг уруудаж байгааг Ерөнхий сайд өөрөө мэдэж байгаа биз. Валютын ханшийн өсөлт буурахгүй байна. Хувийн хэвшлийнхэн дампуурч байна. Ядаж бараа бүтээгдэхүүнийхээ үнийг зогсоогоод өгөөч гэдэг асуудлуудыг тавьж байна” гэлээ.