Шинэчлэлийн Засгийн газар улсынхаа өр зээлийг нэмэгдүүлэх ажлаа л эрчимжүүлж байна. Түүнээс биш эдийн засгаа эрчимжүүлж байгаа юм алга. Эдийн засгийг эрчимжүүлэх 100 хоногийн тоолуур эргээд 30 болох гэж байна. Гэтэл гэрэлтэй гэгээтэй ганц ч сайхан сураг алга. Ээлж дараалсан бараан мэдээ л хөврөх юм. Эдийн засгийг эрчимжүүлэх зөвлөлөөс ганц ч сайн ажил хийсэнгүй.

    Өр зээлийг нэмэхийн эсрэг хүчтэй байр суурь илэрхийлэх болсон МАН-ыг аргалж байгаад л Засгийн газрынхан өр зээлээ эвтэйхэн нэмчих сийхийг л хайж эхлэв. Хамгийн сүүлд л гэхэд МАН-ын бүлгийн гишүүдийг энэ, тэнд хуралдаж байх хойгуур Засгийн газар гурван том зээл авсан гэж эх сурвалж мэдээллээ. Азийн хөгжлийн банкнаас "УБ хотын гэр хорооллыг хөгжүүлэх, хөрөнгө оруулалтын хөтөлбөр"-ийн хүрээнд 224 сая долларын, "Инженер технологийн дээд боловсрол" төслийг хэрэгжүүлэхийн тулд Японоос 74,1 сая долларын,  "Хүнс тэжээл, нийгмийн халамжийн төсөл"-ийг хэрэгжүүлэхээр АХБ-наас 20 сая ам долларын зээл авахаар болсон гэнэ. Ингээд Шинэчлэлийн Засгийн газар эдийн засгийг эрчимжүүлэх 100 хоногийн эхний гараан дээрэээ өр зээлээ 318.1 сая ам.доллараар нэмчихлээ. Эдгээр зээлүүдийг урт хугацаандаа төлөх гэнэ. Тэгэхээр дараагийн Засгийн газар л ачааг үүрэх бололтой.

    Эдийн Засгийн эрчимжүүлэх хугацаанд авах өр зээл үүгээр дуусахгүй бололтой. Одоо УИХ-аар хэлэлцэж байгаа "Өрийн удирдлагын тухай хууль"-иар өрийн хязгаарыг ДНБ-ний 70-90 хувьд хүргэхээр төлөвлөсөн. Хэрэв түүнийг нь МАН-ынхан дэмжвэл асар их хэмжээний зээл авах эрх нь нээгдэх гэнэ. Тийм учраас л ийм эрхийг нээхийн төлөө Шинэчлэлийн Засгийн газрынхан хичээж ажиллаж эхэлжээ. Тэгээд өр зээл авах боломжийг нэгэээд өгчихвэл улс орон жинхнээрээ эрчимжинэ гэж сурталчилж яваа сураг гарлаа.

    Асуудал үүгээр дууссангүй. Засгийн газрынхан жижиг, дунд үйлдвэрлэлийг дэмжих нэрээр Японы Засгийн газраас буюу ЖАЙКА-гаас ихээхэн хэмжээний зээлийг авахаар төлөвлөж гэрээ хэлцэлүүдийг хийгээд эхэлчихжээ. ЖАЙКА-гаас авах зээлийг жижиг, дунд үйлдвэрлэгчидэд тарааж өгнө. Үр дүнд нь жижиг, бизнес цэцэглэж, эдийн засаг эрчимжинэ гэж төлөвлөсөн бололтой. Японы тал ч асуудалд нааштай хандаж байгаа гэнэ. Засгийн газрынхан ч асуудлаа шийдүүлэхийн тулд урамтай зүтгэх болсон гэж эх сурвалж мэдээллээ. Харин зээлийн хэмжээ хэд гэдэг нь тодорхойгүй байгаа аж. Ийнхүү эдийн засгийг эрчимжүүлэхийн тулд эрх баригчид өр зээлийн хойноос шогшиж байна. 100 хоногийн тоолуур эргэж байна. Бас түүнийг хянах ёстой МАН-ынхны "Ард-100"-гийн тоолуур ч эргэх боллоо. Энэ олон тоолуурын хооронд ард түмэн л өрөнд баригдчих вий дээ гэх айдас хүмүүсийн дунд улам нэмэгдэж байна.