Чуулганы үдээс хойшхи хуралдаанаар Ерөнхий сайдын багцад тусгагдсан 50 тэрбум төгрөгийн зарцуулалтын талаарх мэдээллийг сонсож байна. Хуралдааны эхэнд Ерөнхий сайд УИХ-ын гишүүдэд мэдээлэл өгч дээрх мөнгийг тодорхой ямар ажлуудад зарцуулсан талаараа дэлгэрэнгүй тайлбар хийлээ.

Тэрбээр өөрийн мэдлийн 50 тэрбум төгрөгөөрөө зарим аймгийг битүү захтай болгож, 11 аймгийг оношилгооны төвтэй болгосон байна. Мөн залуучуудын соёлын төвийг барьж, зарим эмнэлэгүүдэд хэрэгтэй тоног төхөөрөмжүүдийг нь авч өгөхөөс эхлээд маш олон ажлыг хийсэн гэв.

Харин МАН-ынхан 50 тэрбум төгрөгийн зарцуулалтын талаарх дэлгэрэнгүй мэдээлэл байхгүй байна гэлээ. Мөн энэ мөнгөөр бүтээн байгуулалтын ажлыг хийхдээ зарим хүмүүс ашиг сонирхлын болоод тендерийн хуулийг зөрчсөн байх  магадлалтай гэсэн юм.

Тухайлбал УИХ-ын гишүүн Су.Батболд “50 тэрбум төгрөгийг ТҮЦ машин зэрэг хэрэггүй зүйлд зарцуулсан. Мөн баруун гурван аймагт битүү худалдааны төв байгуулахдаа Засгийн газрын хэрэг эрхлэх газрын дарга Ч.Сайханбилэгийн таньдаг хүнд тендерийг нь өгсөн. Ийм зүйл хийхээ боль. Битүү зах барих ажлыг Ерөнхий сайд хийх ямар ч шаардлагагүй. Үүнийг бизнесмэнүүдээр хийлгэх боломжтой байсан шүү дээ” гэв. 

Харин Ерөнхий сайд хариулахдаа “Тендер зохион байгуулах ажлыг би хийдэггүй. Сайдад тэр ажил ямар ч хамаагүй. Задгай зах дээр худалдаа хийдэг хүмүүст битүү зах үнэхээр хэрэгтэй. Тэнд зогсож байгаа ээж нарыг харахаар нүднээс нулимс гардаг.  Та өөрөө хоёр цаг гадаа хүйтэнд зогсоод үз. Өвлийн хүйтэнд наймаа хийж үзээгүй  болохоороо ийм зүйл ярьж байна. 11 аймгийг оношилгооны төвтэй болголоо. Тэр төвөөр чинь олон хүн үйлчлүүлээд эмчилгээ оношилгоо хийлгэж байна. Та нар бүх зүйлийг битгий харлуул. Өнгөрсөн хугацаанд өөрсдөө энэ ажлыг хийчихгүй яасан юм. Нэмж хэлэхэд би 50 тэрбум төгрөгөөр ТҮЦ машин оруулж ирээгүй. Оруулж ирэх гэж судалж байсан” гэв.