Чуулганы хуралдаанаар Монгол Улсын Ерөнхий сайд Н.Алтанхуяг 2013 оны Ерөнхий сайдын багцад хуваарилагдсан 50 тэрбум төгрөгийн хөрөнгө оруулалтын зардлыг тайлагналаа. 

Эл асуудалтай холбогдуулж УИХ дахь МАН-ын бүлгийн гишүүд Ерөнхий сайдад хандан асуулт тавьж, санал хэлж байна.

Тухайлбал, УИХ-ын гишүүн О.Содбилэг Ерөнхий сайдын 50 тэрбум авлигажсан юм биш үү гэж Ерөнхий сайдаас асуув. Өмнө Ерөнхий сайд царцаасан барилгуудын асуудлыг "авлигажсан төсөв" гэж цоллосон. Харин энэ удаа О.Содбилэг гишүүн Ерөнхий сайдын мэдлийн 50 тэрбумын ажлыг "Авлигажсан 50 тэрбум" гэж хариу цоллосон энэ. Учир нь Ерөнхий сайдын мэдлийн 50 тэрбум төгрөгөөс 18 тэрбум нь ямар ажилд зарцуулсан нь мэдэгдэхгүй алга болсон гэж МАН-ын бүлгийн гишүүд үзэж байгаа юм.

Мөн УИХ-ын гишүүн Д.Оюунхорол "Татвар төлөгчдийн нэг төгрөгийг юунд зарцуулсныг бид мэдэх шаардлагатай. Ер нь та хууль бусаар улсын төсвийн мөнгийг зарцуулснаа хамгаалаад байх шаардлагагүй. Ерөнхий сайд ганцаараа 50 тэрбумыг зарцуулдаг байж болохгүй. Эмнэлэгийн тоног төхөөрөмж оруулж ирсэн гэж хэлж байна. Ер нь ямар үнэтэй хэдэн мм зүсэлттэйгээр оношилгоо хийдэг аппаратыг оруулж ирснээ хэл. Тоног төхөөрөмжүүдийг оруулж ирсэн газар нь 64 мм-ийн зүсэлттэй оношилгоо хийдэг аппарат гэж танилцуулсан байна. Гэтэл 16 мм-ийн зүсэлттэй оношилгоо хийдэг тоног төхөөрөмж байна гэж хүмүүс надад хэлсэн. Энэ асуудлыг аудитын газарт хандаж шалгуулна. Ард иргэдийн хамгийн ихээр хүсэн хүлээж буй зүйл дээр тоглож мөнгө хийхээ боль" гэв.