Ерөнхий сайдын эдийн засгийн бодлогын зөвлөх Д.Батмөнхийг битүү зах, худалдааны төвийн тендерт оролцогсдыг сонгон шалгаруулахдаа Ашиг сонирхлын зөрчлийн тухай хуулийг зөрчсөнийг Авлигатай тэмцэх газар нотолсон. Үүнийг  сөрөг хүчин Ерөнхий сайдын 50 тэрбумын зарцуулалтыг тайлагнах үеэр дахин сануулсан юм. Яагаад гэвэл энэ 50 тэрбумаар хийсэн ажлуудын нэг нь түүний зөвлөхийн нэр холбогдоод байгаа битүү зах юм. Тэрээр сая чуулганы нэгдсэн хуралдаан дээр нэр дурдагдсан компанийн удирдлагуудтай танил гэдгээ хэлж, үнэлгээний хороонд орж шалгаруулалтад санал өгдөг болохоо мэдээллээ. Харин УИХ-ын дарга З.Энхболд "Чи ер нь тендерийн хороонд орж болохгүй нөхөр байна шүү. Монголын бүх компанийг таних юм байна" гээд түүнийг дахин тендерийн хороонд орохгүй байхыг анхаарууллаа. Хариуд нь "За мэдлээ, дарга аа" хэмээн Д.Батмөнх зөвлөх хариулав.