Өнгөрөгч долоо хоногийн УИХ-ын нэгдсэн чуулганы хуралдаан дээр  Ц.Нямдорж гишүүн эрх баригчдад хандаж мухар сүсгийн шинжтэй шийдвэр гаргахаа болиоч хэмээн нэлээд ширүүн шүүмжилсэн. Тэрээр “Та нар бөөгийнхөө тойргоос гараач ээ. Нэг л их хачин тэнгэрээс авсан тоо яриад явах юм. 100 хоногийн дотор хямралаас гарна л гэнэ.  888 төсөл хэрэгжүүлнэ л гэнэ. Энэ золбин бөөгийн торгоосоо хэзээ гарах юм, болиод өгөөч ичиж үхмээр юм. Дээшээ харж гал түлсээр байтал энэ улс орон чинь хямарч дууслаа. Цөмөөрөө бөө боллоо. Золбин бөөгийнхөө тойргоос хурдан гараач” гэсэн нь олон хүний амны зугаа болж байна. Нэг хэсэг нь “Эрх баригчид бэлэгдэл, сүсэг бишрэлийн хүчин зүйлд хэт автсан байдлыг шүүмжилсэн нь зөв зүйтэй. Төрийн ажил мухар сүсгийн шинжтэй болоод байгаа нь үнэн” гэж байгаа бол “Монголын төр эртнээс нааш мөнх тэнгэрээ шүтэж, бэлэгдэж ирсэн. Гэтэл Ц.Нямдорж гишүүн “золбин бөө” гэх мэтээр байж болохгүй үг унагасан нь буруу” гэж дүгнэж байна.

    Ямартай ч төр засгийн ажилд бөөгийн сүсэг бишрэлтэй холбоотой үг, үйлдэл ихээр харагдах болсон. Түүний гол төлөөлөл нь эдийн засгийн хөгжлийн сайд Н.Батбаяр билээ. Эрхэм сайдын ажлын арга барил, хандлагатай холбоотой явган яриа ордны хонгилоор нэг холхих болсоор удаж байна. Тухайлбал Н.Батбаяр сайдад долоогийн тоогоор төгссөн дугаартай албан бичиг явуулсанд хариу ирүүлээгүй. Хэзээ хариу  ирүүлэх вэ? гэтэл “та долоогийн тоогоо найм болгоод дахиад явуул” гэсэн, Н.Батбаяр сайдтай албаны ажлаар уулзах гээд очтол “уучлаарай та жаахан хүлээчих могой цагт сайд хүнтэй уулзахгүй, морь цаг гарахад хэдхэн минут байна” гэж туслах нь зөвлөсөн, нэгэн сэтгүүлч “сайдаа танаас бонд, төсөвтэй холбоотой ярилцлага авах гэсэн юм” гэтэл “юун бонд, төсөв би гал тахиад завгүй байна” гэж хариулсан гэх мэт шог яриа газар аваад байгаа. Энэ бүхнээс үүдэж эрх баригчид төрийн ажилд ажил хэргийн биш мухар сүсгийн байдлаар ханддаг болсон хэмээн олон нийт шүүмжлэх болсон билээ.

    Тэгвэл үүнийг батлах бас нэгэн үйл явдал энэ амралтын өдөр болжээ. Нам дотроо хамгийн боловсролтой хэмээн үнэлэгддэг. “Алтангадас” фракцынхан өөрсдийн овоогоо өнгөрөгч бямба гарагт тахиж ёслол үйлдсэн байна. Зуны эхэн сарын шиний найманы билэгт сайн өдөр 17:00 цагт тэдний Цончинболдог дахь овооны тахилга албан ёсоор эхэлж тус фракциас төр засгийн өндөр албан тушаал хашиж яваа томчууд, идэвхтэн гишүүд нь өргөнөөр оролцсон байна. Тахилгад оролцогчид Цончинболдогт байрлах “Хаан жимс” амралтын газарт тухалжээ. Энэ амралтын газар нь Ерөнхий сайд Н.Алтанхуягийнх бөгөөд “Алтангадас” овооны их тахилгын хамгийн хүндтэй зочин  тэрээр тахилгад өөрийн биеэр оролцож фракцынхнаа нэгтгэсэн байна. Ийнхүү “Алтангадас” овооны тахилга тайллага сайхан болж дарга нар маань улс орны эдийн засгаа дээд тэнгэртээ даатгаж, ард иргэдийнхээ буян заяаны төлөө залбирсан тул байдал удахгүй дээрдэх буй за.

    Сөрөг хүчний зүгээс бөөгийн тойргоосоо гарахыг сануулсанд хариу барьсан уу? эсвэл эрх баригчид маань үнэхээр дээд тэнгэртэй холбогдож ажил хэргээ явуулдаг болсон уу?  гэсэн асуулт өөрийн эрхгүй урган гарч байна.

     Хэрвээ АН-ын бүлэг фракц дор бүрнээ өөрсдийн шүтээн овоотой болж байгаа бол тун удахгүй сүрт тахилгын уралдаан эхлэх нь. МоАХ-ны овооны тахилга, МҮДН-ний овооны тахилга, Шонхорын овооны тахилга гэх мэт улс төрд цоо шинэ өрсөлдөөний хандлага бий болж, тэнгэрт тултал дүрэлзсэн сүрт галын тахилгууд ар араасаа дарааллах нь.  Шоог,  шоог,  шоог...