Шинэчлэлийн Засгийн газрын эдийн засгийг аврах их ажиллагаа үргэлжилсээр. 100 хоногт эдийн засгийг өндийлгөж чадах төлөвлөгөө боловсруулсан гэж буй Ерөнхий сайдын багийнхан одоогийн байдлаар ямар нэгэн бодит үр дүнтэй ажил хийгээгүй л байна. Гэхдээ үлдсэн 70 хоногт хичээн, зүтгэх биз.

Тэд үлдэж буй хоногуудад их ажил хийхээр төлөвлөөд буй. Тухайлбал зарим орд газрыг эдийн засгийн эргэлтэд оруулах, төмөр замын царигийн асуудлаа шийдэх, холбогдох зарим хуулиа батлуулах гээд. Ер нь тэгээд эдийн засгийг өндийлгөхийн тулд есөн шидийн ажлыг хийхээр төлөвлөөд байгаа. Засгийн газар өнгөрсөн бямба гаригт хуралдаж Төрийн өмчит үл хөдлөх хөрөнгүүдийг нээлттэй дуудлага худалдаагаар худалдах шийдвэрийг гаргажээ. Эдийн засгийг эрчимжүүлэх зарим арга хэмжээний хүрээнд авч хэрэгжүүлж буй уг ажлын хүрээнд нийт 32 аж ахуй нэгжийг хувьчлах юм байна. Үл хөдлөх хөрөнгийг газрын хамтаар хувьчлах их ажлыг Сангийн сайд Ч.Улаан гардан зохион байгуулж, дуудлага худалдааны орлогыг улсын төсөвт төвлөрүүлэх юм байна. Уг хувьчлалаас олсон мөнгөөр эдийн засгийг эрчимжүүлнэ гэж үзэж байгаа аж. Энэ тогтоол хэрэгжсэнээр төрийн өмчийг эзэнтэй болгох, ашиглалтыг сайжруулах, төсвийн дарамтыг багасгах, төсвийн орлогыг бүрдүүлэхэд зохих үр дүнг үзүүлнэ гэж Засгийн газраас тайлбарлаж байна.

Харин яг ямар газруудыг хувьчлахыг УИХ-аар хэлэлцэх юм байна. Уг асуудлыг хэлэлцэх үеэр сөрөг хүчний ширүүн шүүмжлэлтэй тулгарах нь тодорхой юм. Манай улсад өмнө нь их хувьчлалын ажил явагдаж байсан бөгөөд тэр нь 1996-2000 оны хооронд АН-ынхны хийсэн ажил юм. Тухайн үед Монголын гайгүй гэсэн бүхнийг хувьчилчихсан гэж хүмүүс ярьдаг. Түүнээс хойш өнөөдрийг хүртэл хувьчлалын ажлыг явуулаагүй ирсэн. Харин АН-ынхан дахиад хоёр дахь их хувьчлалыг явуулах гэж байна. Хямрал нэрээр 32 аж ахуйн нэгжийг хувьчлах нь буруу гэж хэлэх хүмүүс  байна. Учир нь лоббидоод төрийн өмчийг хямд худалддаг хуучин аргыг хэрэглэнэ. Тэгэхээр Төрийн өмчийг таньж, мэдэх хүмүүстээ хямдхан өгөөд л асуудлыг намжаах талтай. Улсын өчнөөн сая төгрөгөөр боссон үйлдвэрүүд хувийнхны гарт хямдхан очих нь хэн, хүний дургүйг хүргэх нь аргагүй юм.

Хамгийн сонирхолтой нь зуны цагт иргэд амарсан цагаар уг шийдвэрийг гаргаж байгаа нь бас л нэг хардлагыг төрүүлж байна. Ямартай ч энэ зундаа багтааж 32 үйлдвэрийг чимээгүйхэн эзнийг нь бараадуулах нь тодорхой боллоо.