УИХ дахь бие даагчдын зөвлөл өнөөдөр хуралдаж, энэ долоо хоногт Байнгын хороо, УИХ-ын чуулганаар хэлэлцэх асуудлуудын талаар хэлэлцжээ. Бие даагчдын зүгээс энэ долоо хоногт хэлэлцэх Ашигт малтмалын тухай хууль, Төрөөс боловсролын талаар баримтлах бодлого, Үндэсний их баяр наадмын тухай хууль болон Газрын тухай хууль дээр өөрсдийн байр сууриа нэгтгэжээ.

Тус бүлгээс Засгийн газраас өргөн барьсан Ашигт малтмалын тухай хууль дээр тодорхой байр суурь баримтлахаар болсон байна.  Монголчууд уул уурхайгаа ашиглаж байгаа ч эдийн засаг хүндэрч, валютын хэлбэлзэл үүсч байгаа нь ашиггүй гэрээ байгуулсантай холбоотой гэж бие даагчид үзэж байгаа юм. Тиймээс Ашигт малтмалын хууль дээр гэрээний асуудлыг Монголын талд ашигтай байдлаар байгуулах, стратегийн ордод төр тодорхой хувь эзэмших, баялгийн орлогыг Монголоор дамжуулах ёстой, страгегийн орд байх эсэх зэрэг асуудлаар тодорхой байр сууриа нэгтгээд байгаа аж. Тухайлбал, УИХ-ын гишүүн Х.Болорчулуун Ашигт малтмалын тухай хуулийн ажлын хэсэгт багтаж байгаа бөгөөд стратегийн ордыг байхгүй болгох талаар ярилцаж байгааг шүүмжиллээ. УИХ-ын гишүүн Х.Болорчулуун "Монгол Улсын ДНБ-ний таваас дээш хувьтай тэнцэх нөөцтэй ордыг стратегийн орд газар гэж нэрлэдэг. Монгол Улсад 15 стратегийн орд газар бий. Гэтэл Ашигт малтмалын тухай хуулийн ажлын хэсэг дээр энэ стратегийн орд газрын байхгүй болгоно гэж ярьж байгаад харамсч байна. Бүх улс орон өөрийн гэсэн стратегийн ордтой байдаг бөгөөд төр нь 50 хүртэл хувь эзэмшдэг. Хэрэв Монгол Улс стратегийн орд газаргүй бол улс орны аюулгүй байдал нөлөөлөхүйц зүйл болно" гэлээ.

Бие даагчдын зөвлөлөөс Төрөөс боловсролын талаар баримтлах бодлогод боловсрол хүний авъяасыг нээж өгдөг байх ёстой гэсэн бодлого баримтлах аж. Өөрөөр хэлбэл, өөрийнхөө онцлогт тааруулан авъяасаа нээх, хөгжүүлэх бодлогыг Монгол Улс баримтлах ёстой гэв. Үүнээс гадна энэ долоо хоногт Үндэсний баяр наадмын тухай хуулийн төслийг хэлэлцэх гэж байгаатай холбогдуулан энэ хуулийг эсэргүүцнэ гэдгээ мэдэгдлээ. Энэ хууль нь бөхчүүд хүч нь дутаад ирэхээр тэдэнд цол өгөхийн тулд хуульд өөрчлөлт оруулж, цол өгөх гэсэн ичмээр хууль гэж үзэж байгаа гэв.

Хоёр долоо хоногийн өмнө бие даагчдын зөвлөлөөс Монголбанкны удирдлагад хариуцлага тооцох талаар УИХ-ын дарга саналаа хүргүүлсэн бөгөөд үүнд нь УИХ-ын дарга хариу өгсөн байна. УИХ-ын дарга З.Энхболд УИХ-аас томилдог байгууллагын удирдлагад хариуцлага тооцох асуудлыг хөндөх эрхтэй боловч Монголбанкны ерөнхийлөгчийг томилох, халах асуудал өөр зохицуулалттай байдаг гэсэн хариу өгсөн байна. Энэ бичгээ өнөөдөр өгсөн бөгөөд энэ асуудлыг удахгүй байр сууриа нэгтгэн хүргэнэ гэдгийг УИХ-ын гишүүн С.Ганбаатар онцоллоо. Үүнээс гадна Газрын тухай хуулийн төслийг Засгийн газраас оруулж ирснийг бие даагч гишүүд эсэргүүцэж байгаа бөгөөд газрын эзэн нь ард түмэн бус эдийн засгийн эргэлтэд оруулна гэсэн нэрийдлээр хувьчлах гэж байна гэж шүүмжилж байгаа юм байна. Эдийн засгийн эргэлтэд оруулна гэсэн нэрийн дор хувьчлах асуудлыг Газрын тухай хуулиар хөндөж байгаа учраас энэ хуулийг эргүүлэн татахыг дахин санууллаа.