УИХ-ын гишүүн Ж.Батзандан Баянзүрх дүүрэг дэх эмнэлэг, цэцэрлэг, сургуулийн барилгын засвар, өргөтгөл шинэтгэлийн ажлын талаар өнөөдөр сэтгүүлчдэд мэдээлэл хийлээ. Төсөв хөрөнгө нь шийдэгдсэн Гуравдугаар төрөх эмнэлгийн шинэ барилгын ажил энэ оны 9,10 дугаар сард дуусч, ашиглалтад орно гэдгийг УИХ-ын гишүүн Ж.Батзандан хэллээ. Мөн улсын Хоёрдугаар эмнэлгийг дарга нарынх биш ард иргэдийн эмнэлэг болгохоор ажиллаж байгаа тухайгаа дуулгасан юм.

Тэрбээр энэ талаар ярихдаа "Хоёрдугаар эмнэлэгийг дарга нарынх бус ард иргэдийнх байлгах ёстой. Энэ эмнэлэгээр өнөөдөр 18.000 дарга үйлчлүүлдэг. Гэхдээ тэд бусад эмнэлэгээр ч үйлчлүүлэх боломжтой. Тиймээс би тус эмнэлэгийг энгийн иргэдийнх болгохын тулд холбогдох зарим хуульд өөрчлөлт оруулахаар ажиллаж байгаа" гэв.

Мөн Налайх дүүргийн нэгдсэн эмнэлгийн барилга хуучирч муудсан учир концессийн гэрээгээр тус эмнэлгийн барилгыг өргөтгөн засварлахаар болсныг ч энэ үеэр дурдлаа. Түүнчлэн Улаанбаатар хотын хүн ам ихтэй Баянзүрх дүүргийн хувьд цэцэрлэгийн хүрэлцээ тун муу. Тиймээс гэрээр хүүхэд харах үйлчилгээг эхлүүлэх, энэ тухай хуулийг батлуулах асуудалд анхаарлаа хандуулан, ажлын хэсэгт орж ажиллаж байгааг хэлсэн юм. Цаашилбал энэ чиглэлээр үйл ажиллагаа явуулах хүсэлтэй хүмүүс Ж.Батзандан гишүүнд хандаж болох аж. Мөн энэ чиглэлээр ажиллах, хүүхэд харах үйлчилгээ эрхлэх хүсэлтэй аж ахуйн нэгжүүд хандаж болно хэмээн тэрбээр онцолсон. Баянзүрх дүүрэгт 1.5 тэрбум, Налайх дүүрэгт 600 сая төгрөгийг Бичил бизнес эрхлэхэд зориулсан тусгасан бөгөөд энэ мөнгөнөөс Хүүхэд харах үйлчилгээ эрхлэгчдийг санхүүжүүлэх боломжтой гэлээ.

Нийслэлийн хэмжээнд эмзэг бүлгийн хүмүүст эмнэлгийн тусламж үйлчилгээ үзүүлдэг Баянзүрх дүүрэг дэх “Энэрэл” эмнэлэг нь ачааллаа даах больсон байна. Тиймээс тус эмнэлгийн барилгыг өргөтгөж, засах ажлыг хийхээр болжээ. Өнгөрсөн жил Баянзүрх дүүрэгт улсын төсвөөс 34 тэрбум, нийслэлийн төсвөөс 24,3 тэрбум төгрөгийн хөрөнгө оруулалт хийгдсэн байна.