АН-ын бүлэг хуралдаж, энэ долоо хоногт Байнгын хороо, УИХ-ын чуулганаар хэлэлцэх асуудлын талаар хэлэлцжээ. Тус бүлгээс хүлээлгэдэж буй чухал хуулиудыг яаралтай батлах шаардлагатай гэдэг дээр саналаа нэгтгэсэн байна. Тухайлбал, Ашигт малтмалын тухай хууль, Өрийн удирдлагын тухай хууль, Тендерийн тухай хууль, Газрын тосны тухай хууль, Газрын тухай хууль, Төсвийн тогтвортой байдлын тухай хууль, Нягтлан бодох бүртгэлийн тухай хууль зэрэг олон хуулийн нэн даруй батлах ёстой гэв.

Эдгээр хуулиуд нь бүгд Эдийн засгийг эрчимжүүлэх, бизнесийн орчинг төрөөс хараат бус байлгах эрх зүйн орчныг сайжруулсан хуулиуд юм. Тиймээс эдийн засгийг эрчимжүүлэхэд гол нөлөө үзүүлэх дээрх хуулиудыг хэлэлцэж батлах ёстой гэж АН-ын бүлгийн дарга Д.Эрдэнэбат хэллээ.

Мөн хэд, хэдэн ажлыг яаралтай хэрэгжүүлэхийг Засгийн газарт даалгажээ.

Тодруулбал, Эдийн засгийн чөлөөт бүсийг даруй ашиглах мөн Төрийн өмчийн зарим аж, ахуй нэгжийг хувьчлах, Тусгай зөвшөөрлийг багасгах, Эдийн засгийн ил тод байдлын тухай хуулийг өргөн барихыг даалгажээ.

Мөн Ерөнхийлөгчийн өргөн мэдүүлсэн Шилэн дансны тухай хуулийг АН-ын бүлгээс дэмжиж байгаа. УИХ дээр унагасан шалтгаан нь дагалдах бусад хууль тогтоомжоо сайжруулаад оруулж ир гэсэнтэй холбоотой. Түүнээс биш Ерөнхийлөгчийн өргөн мэдүүлсэн хуулийг эсэргүүцээгүй гэж тус бүлгээс мэдэгдлээ.

Сонгуулийн тухай хуулийг дахин боловсруулах шаардлагатай байгаа талаар АН-ын бүлгийн дарга онцоллоо. Мөн НӨАТ-ын тухай хуулийн талаар зарчмын зөрүүтэй саналаа цэгцлэх шаардлагатай гэж тус бүлгээс үзэж байгаа аж. НӨАТ-ын тухай хуулийн босгыг 50 сая хүргэхийг бизнес эрхлэгчид дэмжихгүй байгаа аж. Тус бүлэг өнгөрсөн долоо хоногт бизнес эрхлэгчдийн төлөөлөлтэй уулзаж, санал бодлыг нь сонссон байна. Энэ үеэр бизнес эрхлэгчид саналаа гаргасан нь энэ юм байна. Мөн НӨАТ төлсөн иргэдийн төлсөн мөнгөний тодорхой хувийг буцаан олгох шийдвэр нь хэр оновчтой гэдэг дээр дахин судлах шаардлагатай гэлээ.