Ардчилсан намын бүлгийн мэдээллийн дараа нь бүлгийн дарга Д.Эрдэнэбат сэтгүүлчдийн асуултад хариуллаа. 

-Үйлдвэр хөдөө аж ахуйн сайдад Ш.Түвдэндоржийг томилох асуудалд намын бүлгийн  байр суурь хэвээрээ байгаа юу?

-Үйлдвэр хөдөө, аж ахуйн сайдын суудалд Ардчилсан намын байр суурь хэвээрээ байгаа. Энэ 7 хоногт асуудал хэлэлцэгдээд явна.

-Зургаан аймгийг хатуу хучилттай автозамаар холбох ажил дээр хоёр аймгийн төсөв мөнгийг танасан гэх мэдээлэл байна. Эсвэл бүгдийг нь ингэж танаж байгаа юм уу?

-Аймгуудыг автозамаар холбож дуусах Засгийн газрын мөрийн хөтөлбөр хэвээрээ хэрэгжиж байгаа. Концессын тендерийн үйл ажиллагаа долдугаар сарын 1-нд дуусна. Замын ажил хийгдээд явна.

-Сонгуулийн хуулийг энэ 7 хоногоос идэвхижүүлнэ гэлээ. Идэвхжүүлэх тал дээр ямар, ямар асуудал дээр тогтож ярих вэ?

-Сонгуулийн хуулинд бидний баримталж байгаа бодлого яг хэвээрээ байгаа. Өөрөөр хэлбэл бид холимог системээ цаашид хадгалж явах нь зүйтэй гэсэн байр суурин дээр байгаа. Пропорцианаль нь 50 хувь, можаратор нь 50 хувь байх ёстой гэсэн зарчмын байр сууриа Ардчилсан нам илэрхийлсэн. Энэ байр суурин дээрээ өнөөдрийг хүртэл хэвээрээ байгаа.

-Улс төрийн намын тухай хуулинд нэмэлт, өөрчлөлт оруулах судлах ажлын хэсгийг УИХ-ын гишүүн С.Баярцогт ахлаад ажиллаж байгаа. Ажлын явц ямар байгаа вэ?

-Намын тухай хуулинд ганц зүйл дээр тохиролцохгүй байх шиг байна. Намын өмчийн асуудал нэлээд маргаан дагуулж байгаа юм. Гишүүнчлэлтэй байх, байхгүй тухай асуудал мөн маргаан дагуулж байгаа. Тийм учраас маргаантай байгаа асуудлыг УИХ-д татаж оруулах нь ямар байх бол гэсэн эргэлзээ байгаа. Үүнийг нэг тийш нь болгож чадвал энэ асуудал УИХ-д яригдана.

-Эдийн засгийн өршөөлийн тухай хуулийг Засгийн газар боловсруулсан байгаа юу. Цензурийг нь хэрхэн тавих вэ?

-Эдийн засгийн ил, тод байдлын тухай хууль гэж нэрлэгдэж байгаа. Өөрөөр хэлбэл иргэн, аж ахуйн нэгж өнөөдрөөс эхлээд өөрийнхөө байгаа санхүү болон хөрөнгөө ил тод мэдээллээд цаашид бүх зүйлээ тунгалаг болгох ёстой гэсэн хууль юм. Хүнийг гэмт хэрэг талаасаа илүү эдийн засгийн зөв либералчлал иргэн хүн өөрийнхөө өмч хөрөнгийг нээлттэй мэдээлж цаашаа авч явах боломжийг нээх гарааны хууль гэж ойлгож байгаа. Ямарваа нэгэн эрүүгийн хуультай холбоотой асуудлаар ямар, ямар заалт орж ирэх нь өргөн баригдсаны дараа Хууль зүйн яам тодорхой тайлбарыг хийх байх.