УИХ дахь МАН-ын бүлгээс сэтгүүлчдэд мэдээлэл хийлээ.

УИХ дахь МАН-ын бүлэг өөрсдийн боловсруулсан зарим хуулийн төслүүдийг яаралтай батлуулахын тулд УИХ дахь бусад нам эвслийн бүлгүүдтэй тохиролцох ёстой гэсэн саналд байр сууриа нэгтгэжээ. МАН-ын бүлгийн зүгээс санаачлан өргөн барьсан хуулийн төслүүдийг УИХ хүлээж авдаггүй, хүлээж авсан ч  хэлэлцэлгүй уддаг зэрэг асуудал байгааг тус бүлгийн дарга С.Бямбацогт хэллээ. Тухайлбал 2011 онд өргөн барьсан Бүсийн нэмэгдлийн тухай хууль, 2011 онд өргөн барьсан Хувь хүний орлогын албан татварын тухай болон Аж ахуйн нэгжийн орлогын албан татварын тухай хууль мөн хамгийн сүүлд өргөн барьсан  Цалин тэтгэврийг үнийн өсөлттэй уялдуулж жил бүр нэмэгдүүлэх, Малчдын нийгмийн даатгалыг нөхөн төлүүлэх зэрэг хуулийн төслүүдийг одоог хүртэл хэлэлцэхгүй байгаа нь эрх баригчдын явуулга гэв.

Түүнчлэн сүүлийн үед Засгийн газраас өргөн барьж буй хуулийн төслүүд нь УИХ-ын босго давахааргүй дутуу боловсруулагдсан хуулиуд байдаг гэлээ. Тухайлбал Газрын тосны тухай хуулийн төсөл, Газрын тухай хуулийн төсөл зэрэг байгаа аж. Хэрвээ тус хуулиуд нь чанартай байвал аль болох дэмжиж ажиллана гэдгээ МАН-ын бүлгийн дарга С.Бямбацогт хэлсэн юм. Мөн УИХ дахь нам эвслийн бүлгүүд харилцан ойлголцож чадвал УИХ-ын үйл ажиллагаа цаашид хэвийн явах боломжтой гэлээ. Харин Газрын тухай хуулинд МАН-ын бүлгийн зүгээс бэлчээрийн газрын асуудлыг тусгайлан хөндсөн бөгөөд бэлчээрийн газрыг хувьчлах боломжгүй гэдгийг хэлсэн юм.

Тиймээс малчдын дунд ихээхэн гардаг бэлчээрийн маргааны асуудлыг зохицуулахын тулд Бэлчээрийн тухай бие даасан хууль гаргах хэрэгтэй гэдгийг УИХ-ын гишүүн Д.Оюунхорол хэллээ. Мөн гадаадын иргэнд 100 жилээр газар эзэмшүүлэх заалтыг дэмжихгүй гэлээ. МАН-ын бүлэг өнөөдөр үргэлжлүүлэн хуралдаж дотоод асуудлаа хэлэлцэх ажээ.