УИХ-ын гишүүн С.Ганбаатар "албан бус" бүлэг байгуулснаа сүртэй зарлаж баахан шоу хийв. Өөрийнх нь санаачилсан "албан бус" бүлэг гэгчид нь 10 орчим гишүүн байгаа гэж мэдэгдсэн юм. Учир нь наймаас дээш гишүүн нэгдэж байж УИХ-д бүлэг байгуулах боломжтой байдаг. Гэхдээ "албан бус" бүлэг гэсэн томьёлол байдаггүй гэнэ. Тэгэхээр "албан бус" бүлэг гэдэг эрх зүйн хувьд худлаа болж байгаа юм.

    Бас С.Ганбаатар "манай бүлэгт 10 орчим гишүүн бий" гэж мэдэгдсэний дараа АН, МАН-ын бүлгийнхэн гишүүдээ хардаж эхэлжээ. Эцэст нь АН-аас ч, МАН-аас С.Ганбаатарын бүлэгт нэг ч гишүүн элсээгүй аж. Харин тэрээр Г.Баярсайхан, Б.Бат-Эрдэнэ гэх мэт гишүүдийг бүлэгтээ элсээч гэж урилга илгээжээ. Нөгөөдүүл нь мэдээж татгалзаж. Хэн л С.Ганбаатарын бүлэгт орж арьсаа хуулуулахаас гадна ирээдүйгээ будаа болгьё гэж бодохов. Мөн "Шударга ёс" эвсэлээс ч нэг ч гишүүн С.Ганбаатартай нийлнэ гэж хэлээгүй гэнэ. Уг нь О.Баасанхүү, Г.Уянга, Д.Батцогт нарыг нэгдсэн гэж хэвлэлүүд шуугисан. Эх сурвалжийн мэдээлж байгаагаар бол О.Баасанхүү "эзэн" Н.Энхбаяраасаа урвахгүй гэжээ. Харин Д.Батцогт, Г.Уянга хоёр АН-д орохоор тохироо хийж яваа сураг гарлаа.

    Ингээд тооцоод үзвэл С.Ганбаатарын "албан бус" бүлэг гэгчид гурван бие даагчид л байгаа аж. Өөр ямар нэгэн гишүүн нэмэгдээгүй гэнэ. Тийм ч учраас С.Ганбаатар 10 гишүүнийхээ нэрийг зарлаж чадахгүй байна. Түүний "болоогүй байхад хэлээд яахав, эрт зарлаж болохгүй" гэх мэт манж үгийнх нь цаана хэн ч байхгүйг илтгэх боллоо. 

    Ардын уриан зохиолч С.Эрдэнэ агсан сэрүүн ахуйдаа Н.Энхбаярыг "холын шуналтай хүн" гэж цоллож байсан удаатай. Түүн шиг С.Ганбаатар "холын шуналтай хүн" байна. Тэрээр 2017 оны Ерөнхийлөгчийн сонгуульд өрсөлдөхөөр бэлтгэлээ базааж эхэлжээ. Юуны өмнө МАН, АН-ын хэн нь ч түүнийг дэвшүүлэхгүй нь тодорхой. Тиймээс хэсэг нөхөдийг цуглуулж нам байгуулахаар төлөвлөжээ. Тэр санаархалаа хэрэгжүүлэхийн тулд л "албан бус" бүлэг гэгч хууль бус хэллэгийг гаргажээ. Эх сурвалжийн мэдээлж байгаагаар бол тэрээр шинээр байгуулах намаа "Эх орны төлөө нам" эсвэл "Монгол хүний төлөө нам" гэж нэрлэхээр шийджээ. Ирэх намар намаа шинээр байгуулахаар төлөвлөсөн гэнэ. Тэгээд одоо УИХ-аар хэлэлцэх "Улс төрийн намуудын тухай" хуулийн төслийг хүлээзнэж байгаа гэж эх сурвалж мэдээллээ. Ийм зорилгоор С.Ганбаатар нам байгуулахаар сэм хор найруулж эхэлжээ. Харин түүнийг дагах хүн хир олон байх бол?