Эдийн засгийн байнгын хорооны өнөөдрийн хуралдаанаар “Цагаан суваргын ордын төрийн эзэмшлийн хувь тогтоох тухай” УИХ-ын тогтоолын төслийг хэлэлцлээ. Уг тогтоолын төслийг Засгийн газраас өнгөрсөн тавдугаар сарын 23-ны өдөр өргөн мэдүүлсэн юм. 

Байнгын хороогоор уг асуудлыг хэлэлцээд дэмжсэнгүй. Тодруулбал тус хуулийн төсөл дээр ажилласан ажлын хэсгээс Цагаан суваргын ордод төр хувь эзэмших шаардлагагүй гэсэн саналыг гаргасан юм. Гаргасан саналыг Байнгын хорооны гишүүдийн олонхи нь дэмжлээ. Төрийн зүгээс тус ордын 34 хувийг эзэмшинэ гэж байсан юм. Ингэхдээ төр өөрийн эзэмшилдээ 350.6 сая ам.долларын хөрөнгө оруулахаар тогтоолын төсөлд тусгасан нь Засгийн газрын хувьд парламентаас хүчтэй шүүмжлэл сонсоход хүргээд байгаа. Одоо уг асуудлыг чуулганы хуралдаанаар хэлэлцэнэ.

Дорноговь аймгийн Мандах сумын нутагт орших Цагаан суваргын зэс молибдений ордын ашиглалтын тусгай зөвшөөрлийг “Монголын алт” компани эзэмшдэг юм байна. Тус компани 2001-2008 онд өөрийн хөрөнгөөр нарийвчилсан хайгуулын ажил хийж, 2009 онд Эрдэс баялгийн мэргэжлийн зөвлөлийн хуралдаанаар нөөцийн тайлангаа хэлэлцүүлэн баталгаажуулжээ. Үүгээр 250.4 сая тонн хүдэр, 66167 тонн молибден, 11.127 тонн алтыг улсын бүртгэлд бүртгүүлсэн юм байна. Харин хайгуулын ажилд тус компани 2.679.400 ам.долларыг зарцуулсан бол нөхөн төлбөрт 714.760 ам.долларыг төрд төлжээ. Мөн тус компанийн Цагаан суваргын ордод оруулсан хөрөнгө оруулалт одоогоор 323.1 сая ам.доллараар хэмжигдэж байна.