УИХ-ын Эдийн засаг, Байгаль орчин, хүнс, хөдөө аж ахуйн байнгын хороо хамтарсан хуралдаанаар Ш.Түвдэндоржийг ҮХАА-н сайдаар томилох эсэх асуудлыг хэлэлцэв. Түүнийг сайдаар томилох эсэхийг Байнгын хорооны 22 гишүүний 19 нь дэмжсэн юм.

Энэ үеэр гишүүд өөрсдийн байр суурийг хүргэлээ.

УИХ-ын гишүүн Н.Номтойбаяр "Хувь хүнийх нь хувьд дэмжиж байна. Сайд боллоо гээд "давхар дээл"-ээ тайлж, УИХ-ын гишүүнээсээ татгалзаж болохгүй юм уу" гэсэн асуултад нэр дэвшигч Ш.Түвдэндорж "Үндсэн хуулинд намын тухай асуудал тусгайлан заагдсан байдаг. Сонгуульд оролцох, Засгийн газар байгуулах гэсэн заалт байдаг. Тэр үүднээс бид улс орны хөгжлийн талаар, ухаан бодлоо уралдуулахын тулд тус тусдаа нам байгуулаад улс төрийн хувьд шийдвэр гаргаад цөөнх нь олонхоо дагаж явдаг ийм ёсыг дагадаг. Энэ үүднээсээ намын шийдвэр Үндсэн хуульд заасан Засгийн газрын гишүүн, УИХ-ын гишүүний давхар хашиж болно гэсэн заалт хүчин төгөлдөр байгаа нөхцөлд энэ хэвээрээ байна гэсэн намын шийдвэр  гаргавал УИХ-ын гишүүн, Засгийн газрын гишүүнийг давхар хашиж болно. Хэрвээ нам давхар хашиж болохгүй гэсэн бол  түүнийг нь дагахад бэлэн байна.  Монголд Үндсэн хуулиар  энэ асуудлыг зохицуулсан зохицуулалт байгаа учраас одоогийн хуулиа дагаж мөрдөнө" гэлээ.

УИХ-ын гишүүн А.Тлейхан "Хувь хүнийг нь бол дэмжиж байна. Зарчмын хувьд өнөөдөр мөрдөж байгаа хуулийн хүрээнд Ерөнхий сайд кабинетийн гишүүнээ сонгох бүрэн эрхтэй, хуулийн хувьд ч зөрчилдөөн байхгүй. Гэхдээ Монгол Улсын төрийн тэргүүний өгч байгаа  санал зөвлөмжийг яагаад хүлээж авахгүй байгаа юм бэ. Яагаад Ерөнхий сайд, Ерөнхийлөгч хоёр зөрчилтэй байгаад байна вэ. Нийгэм УИХ-ын гишүүн, Засгийн газрын гишүүн байж болохгүй  гэдгийг хүлээн зөвшөөрч байхад энэ байдлыг засах боломж энэ томилгооноос эхлэн хийж болох байсан. Яагаад сөрж, "давхар дээл"-тэй хүн нэр дэвшүүлж байгаа нь ямар учиртай юм бэ" гэсэн асуултад Засгийн газрын хэрэг эрхлэх газрын дарга Ч.Сайханбилэг  "Бид УИХ-ын сонгуулийн дараа шинэ Засгийн газрын бүтэц бүрэлдэхүүн, том зарчим ярьж байх үед байдал нэг  өөр байна байх. Өнөөдөр бол Засгийн газрын нэг гишүүний оронд нөхөн томилох асуудлыг хэлэлцэж байгаа  тохиолдолд арай жаахан өөр хандах ёстой гэж бодож байна. Өнөөдөр Засгийн газрын танхимд хоёр эсвэл гурван гишүүн нь дан дээлтэй байх зарчмын том асуудал  гарахгүй. Ерөнхийдөө бид энэ асуудлыг том зарчмаар нь шинэ Засгийн газар байгуулах үед ярих нь зүйтэй гэдэг дээр 100 хувь санал нэг байгаа. Өнөөдөр Ш.Түвдэндорж гишүүнийг яагаад томилж байгаа вэ гэхээр хариуцлагатай  салбарын бодлогыг хэрэгжүүлээд аваад явах шилдэг боловсон хүчний нэг гэж АН дэвшүүлж байгаа. Тиймээс ажлын шаардлагаар хууль зөрчөөгүй үндэслэлээр оруулж ирж байгаа" гэлээ.

УИХ-ын гишүүн Я.Содбаатар "Энэ салбарт өнгөрсөн  жилүүдэд амжилттай явсан салбар. Үндсэндээ мал аж ахуй, үйлдвэрлэл, газар тариалан гэсэн гурван салбарт голлон анхаарч ажиллаж буй. Сүүлийн жилүүдэд Монгол  мал хөтөлбөрийн хэрэгжилт дээр хангалтгүй ажиллаж байгаа. Энэ хөтөлбөр бол монголчуудын мал аж ахуйн салбарт эргэлт хийсэн, эрчимжүүлэх  чухал хөтөлбөрийг өнгөрсөн парламент баталсан. Энэ хөтөлбөрийг цааш үргэлжлүүлэх дээр хэрхэн анхаарч ажиллах вэ. Мөн газар тариалангийн салбарт Атар-3 аяныг хэрэгжүүлж аюулгүй байдал талаасаа, иргэдийн хүнсний хангамжийн талаасаа ч том дэвшил байсан. Гэтэл өнгөрсөн хоёр жилийн хугацаанд газар тариалангийн бодлогоосоо ухарч гаднаа буудай, үр авч эхэлсэн. Өөрөөр хэлбэл, дотоодын хэрэгцээгээ хангаж чадахаа байсан. Энэ талаар ямар ажил хэрэгжүүлэх вэ. Өөрийн хариуцах гурван чухал салбарт ямар ямар ажил хийх вэ" гэсэн асуултад нэр дэвшигч Ш.Түвдэндорж "Мал аж ахуйн салбар бол манай уламжлалт үндсэн салбар. Үндсэн хуулинд мал сүргийг  төрийн хамгаалалт байна гэж Үндсэн хуульд тусгасан байгаа. тэр утгаараа чухал салбар. Монгол мал хөтөлбөрийн талаар УИХ-ын гишүүдтэй санал хуваалцаж, цаашид ямар арга хэмжээ авах талаараа ярилцсан. Чуулганаар хэлэлцэж байгаа Малын индексжүүлсэн даатгалын хууль болон явж байгаа хөтөлбөрүүдийг цааш үргэлжлүүлнэ. Газар тариалангийн салбарт улаанбуудайг дэмжих салбар орхигдсон тал бий. Үүнээс болж  гаднаас буудай авахад  хүрсэн учраас улаан буудай тариалагчдаа дэмжих төрийн бодлогыг үргэлжлүүлнэ гэж бодож байна. Үйлдвэрлэлийн салбар бол АН-ын мөрийн хөтөлбөрийн гол чиглэл. Одоо хэрэгжиж байгаа, цаашид хэрэгжүүлэх томоохон үйлдвэрлэлүүд дээр анхаарал тавьж ажиллана" гэлээ.

Ингээд хэлэлцэж байгаа асуудалтай холбогдуулан УИХ-ын гишүүн  Д.Дашдорж" Аж үйлдвэрийн хөгжүүлье гэж бодож байгаа бичиг цаастай холбоотой асуудалд нэлээн анхаарлаа хандуулж ажиллаарай.  Ажил хийх цаг хугацаа бага үлдсэн гэхгүй ганц хоёр барилгын шав тавьж, ажил эхлүүлэх талд анхаарлаа хандуулж ажиллах ёстой.  Мөн 2012 оноос хойш мал аж ахуйн салбарт маш олон асуудлыг шийднэ гэж өмнөх сайд ажлаа тайлагнах үедээ хэлж байсан. Ер  нь 2008-2012 онд мал аж ахуйн салбарт өнөөдрийн хүрсэн төвшинд эрх зүйн орчныг зохицуулалтыг энэ дөрвөн жилийн хугацаанд хийсэн шүү гэдгийг зайлшгүй хэлэх ёстой.  Энэ хугацаанд "Монгол мал" хөтөлбөр биржийн асуудал, үнийн тогтворжуулалтын асуудал, түүхий эдийн бүтээгдэхүүний үнийг өсгөх  гэх мэт асуудал бүрэн шийдэгдэж явсан. Тэгэхээр энэ бүхэн дээр анхаарлаа хандуулж ажиллаарай" гэв.