Сүүлийн үед засаг төрийн хөл толгой олдохоо болив. Тийм ч учраас УИХ, Засгийн газар хоёрын хоорондын харилцаа Монголын түүхэнд байгаагүйгээр хүйтэрч байна. УИХ-ын чуулганаар асуудал хэлэлцэхэд яамдын төрийн нарийн бичиг, газар, хэлтэс, агентлагын дарга нар ирэхээ болив. Тэд үндсэндээ УИХ-ын гишүүдийн өмнөөс "салаавч" өгдөг болов. Урьд өмнө ийм үзэгдэл гарч байгаагүй. УИХ-ын 76 гишүүн дуудахад бүх л төрийн байгууллагынхан хавтасаа тэврээд Ц.Элбэгдорж ерөнхийлөгчийн хэлдэгээр "гутлаа тослоод, зангиагаа зүүгээд" гүйгээд ирдэг байлаа. Харин одоо УИХ-ын нэгдсэн чуулганыг таслаад ямар ч шалтгаангүй алга болдог боллоо. Засгийн газрын бүтцийн байгууллагуудын хурган дарга нарын энэ үйлдэл УИХ-ын дарга, гишүүдийн уур бухимдлыг ихээхэн хөдөлгөж эхлэв. Учир нь салбарын асуудал хэлэлцээд асуулт асуух гэхээр мэргэжлийн хүмүүс нь ирдэггүй. Ингээд л УИХ-ын дарга З.Энхболдын бухимдлыг дээд цэгт нь хүртэл оргилуулдаг боллоо. Тийм учраас УИХ-ын дарга З.Энхболд зарчим ярьж хууль тогтоох байгууллагынхаа толгой дээр гараад суучихсан хурган дарга нарын хүнд сурталыг, шүүмжилж эхэлсэн. Зарим үед чуулганд ирэхгүй байгаа дарга нарыг чангаар дуудаж хууль сануулдаг. Нөгөөдүүл нь тоосон шинж алга.

    УИХ-ын нэгдсэн хуралдааныг үл тоодог хурган дарга нар байнгын хороодын хурлыг ч үл тоомсорлодог болов. Өчигдөр л гэхэд Эдийн засгийн байнгын хорооны хуралд Зам тээврийн яамныхан ирсэнгүй. Тиймээс Эдийн засгийн байнгын хорооны дарга Гарамгайбаатар "Зам тээврийн яам УИХ-ын асуудалд дандаа хойрго ханддаг боллоо. Засгийн газар энэ яамандаа арга хэмжээ аваач ээ" гэж учирлах бухимдах хоёрын хооронд хэлсэн юм. Байнгын хорооны даргын энэ ярианаас Засгийн газрын яамд хэрхэн том толгойлж байгааг ойлгож болно.

    Засгийн газрын яамдын дарга нарын ингэж биеэ тоох байдал газар авлаа. Харин Шинэчлэлийн Засгийн газар тэднийхээ толгойг илбээд л өнгөрдөг аж. Тийм учраас хурган дарга нар улам л пээдийсээр байна.

    Тэснэ тэснэ гэхэд УИХ хэдий болтол тэсэхэв нэг л өдөр тэсэрч мэдэх юм. Хэрэв тийм үйл явдал болвол хурган дарга нараас нь өмнө сайд нараар нь УИХ туг тахиж байж асуудлыг хэвэнд нь оруулж мэдэх юм. Мэдээж шинэ сайд нар том толгойтой хурган дарга нарыг төрхөмд нь буцааж байж төрийн түгжирэл арилж мэдэх юм.