Манай улсын Боловсролын салбарт  Кембрижийн стандартыг нэвтрүүлээд багагүй хугацаа өнгөрлөө. Тэгвэл сүүлийн үед энэ стандарт алдагдах тийшээгээхандаж байгаа талаар зарим хүмүүс ярьж байна. Адаглаад Кембрижийн стандартыг нэвтрүүлэх ажил их удаашралтай явж байгаа гэнэ.

Манай улсад жил болгон 50000 хүүхэд сургуулийн босго алхаж, нэгдүгээр ангид элсэн ордог гэсэн статистик тоо баримт бий. Тэгвэл эдгээр хүүхдүүдэд цаг алдалгүй дэлхийн стандартыг сургах хэрэгтэй байгааг зарим албаныхан хэлж байна.

Мөн  хүүхдүүдэд крилл үсгээс гадна монгол бичгийг эзэмшүүлэх нь зүйтэй  гэж зарим иргэд үзэж байхад нөгөө хэсэг нь орчин үед монгол бичгийг ашиглах нь ховор. Харин Латин үсгийг сургалтанд нь оруулж өгөх хэрэгтэй гэх юм. Гэтэл энэ талаар ярилцаж, шийдэлд хүрч, судалгааг гаргах хүмүүс нь алжаа хийж байгаа нь харагдахгүй байсаар өдий хүрлээ.

Тэгвэл гурван үсэгний аль хоёрыг нь хослуулж, ЕБС-ын хичээлийн хөтөлбөрт нь оруулах ёстой вэ гэдэг дээр БСШУЯ-ны сайд асан, УИХ-ын гишүүн Ё.Отгонбаяр ам нээв. Тэрбээр “Орчин цагийн хүүхдүүд хүссэн хүсээгүй техникийн дэвшлээ дагаад гар утас, компьютер дээрээ латинаар бичиж байна. Нэлээд хэсэг хүн одоо байгаагаарай байя гэдэг. Латинд шилжие гэсэн хүмүүс ч бий. Төрийн бодлогоо тодорхой гаргах хэрэгтэй. Уйгаржин Монгол бичиг бол эзэнт Монгол Улсын бичиг. А, Э, У үсэгнүүд адилхан бичигдээд өөрөөр дуудагдаж байна. Ар, өвөр Монголд адилхан бичдэг мөртлөө өөр өөрийнхөө аялгаар дуудаад байна. Крилл үсэг бол БНМАУ-ын хил хязгаарт байгаа халх аялгуунд зориулагдсан үсэг. Латин үсэг бол техник технологийн хөгжлөөр түрж орж ирээд байна. Одоо бичгээ өөрчлөнө гэвэл дагаад хэл өөрчлөгдөнө. Үүнийгээ тооцоод эрдэмтэд аль хувилбар нь дээр вэ гэдгийг гаргаж ирэх л ёстой. Би хувьдаа латин үсэгт шилжих нь зөв гэж боддог.  Яагаад гэвэл тэртэй тэргүй техникийн хөгжлөө дагаад латин үсэгтэй бүхэл бүтэн үе гараад ирлээ” гэжээ.

Сүүлийн үед эх хэлний асуудал олон нийтийн анхаарлыг ийн нэлээд татаад байна. Магадгүй энэ нь дэлхий ертөнцийн  даяарчлагдаж буйтай холбоотой ч байж мэдэх юм. Өөрөөр хэлбэл, шинжлэх ухаан, технологи, хэвлэл мэдээлэл, хүний хүчин зүйл нийгмийн амьдрал, хөгжилд шийдвэрлэх үүрэгтэй болж эх хэлний үүрэг улам бүр өсөн нэмэгдэж байна. Улмаар олон нийтийн эх хэлний боловсрол тааруу болж төр засаг хийгээд боловсрол, шинжлэх ухааны байгууллагаас хэрэгжүүлж буй бодлогууд нь өсөн нэмэгдэж буй энэ эрэлт хэрэгцээний хурдыг гүйцэхгүй байна.

Юутай ч иргэн таньд Латин, Уйгаржин монгол бичгийн алийг нь хүүхдүүд зайлшгүй эзэмших хэрэгтэй вэ? гэдэг асуултыг үлдээе. Эсвэл зөвхөн крилл үсгээрээ л дагнах уу?