Алтангадасынхан Зам тээврийн яамны төрийн нарийн бичгийн дарга Б.Батзаяаг огцруулахаар хөдөлж эхэлсэн талаар эх сурвалж мэдээллээ. Сүүлийн үед өөдтэй мэдээ дуулгахаа больсон тус яамны үйл ажиллагаа муудсан уу гэвэл үнэхээр муудсан. Тодорхой ганц, хоёр жишээ дурдвал, Иргэний агаарын тээврийн компаниуд нь хүндхэн байдалд орсон. Мөн Хятадаас 60 сая доллароор худалдаж авсан вагон зүтгүүр нь Монголд ашиглагдахгүй гэсэн дүгнэлттэйгээр төмрийн хог болоод байж байна.

Энэ мэт тус яамтай холбоотой сайн мэдээ дуулдахаа болиод удлаа. Асуудал намжаагүй байтал Зам тээврийн яамныхныг УИХ-ын үйл ажиллагааг үл ойшоодог гэж гишүүд бухимдах болов. Өчигдөр л гэхэд Эдийн засгийн байнгын хорооны дарга Б.Гарамгайбаатар Зам тээврийн яамныхныг том толгойтой засаг ноёдууд гэж цоллосон юм.  Тодруулбал Эдийн засгийн байнгын хорооны хуралдаанаар "Цагаан суваргын ордод төрийн эзэмшлийн хувь тогтоох тухай" тогтоолын төслийг хэлэлцэх үеэр Зам тээврийн яамныхан орж ирэхгүй удаж гишүүдийг хүлээлгэсэн юм. Чухал асуудлыг шуурхай хэлэлцэж дуусгах ёстой байтал гишүүдийг хүлээлгэж цаг "уялаа" хэмээн уурласан Б.Гарамгайбаатар дарга "Зам тээврийн яамны засаг ноёдууд удаа дараа УИХ-ын асуудалд хойрго хандлаа.  Засаг эдгээр хүмүүстээ арга хэмжээ аваач ээ" гэсэн юм.

Мөн УИХ-ын гишүүн Д.Ганбат ч тус яамныхныг  "хүнд сурталтай дарга нараар дүүрсэн газар" гээд авсан.

Ер нь сүүлийн үед Зам тээврийн яамныхныг УИХ-ын үйл ажиллагаанд хайхарамжгүй ханддаг болсон талаар гишүүд ярьж байгаа. Өмнө МАХН-МҮАН-ын "Шударга ёс" эвслийн бүлгийн дарга Н.Батцэрэг тус яамны сайд А.Гансүхийг бүлгийн хуралд нь удаа дараа ирж суугаагүй гэдэг шалтгаанаар буруушааж мэдэгдэл хийж байсан. Мөн Ерөнхий сайд Н.Алтанхуяг тус яамны Төрийн нарийн бичгийн дарга Б.Батзаяад "Ажлаа хийж чадахгүй бол яваарай" гэсэн утгатай үгийг хэлээд амжсан билээ.

Угтаа бол УИХ-ын үйл ажиллагаанд яамдууд идэвхтэй оролцож хамтарч шийдвэр гаргах ёстой билээ. Мөн УИХ-ын гишүүдэд тодорхой мэдээллийг цаг алдалгүй өгөөд явах учиртай юм. Гэтэл тус яамныхан хүнд суртал гаргаж байгаа нь Ерөнхий сайдаас эхлээд УИХ-ын гишүүдийг уурыг бараад байгаа нь энэ юм. Тиймээс Зам тээврийн яам руу хандсан ялангуяа төрийн нарийн бичгийн дарга руу дайрсан шүүмжлэл газар авав. Эдийн засгийн байнгын хорооны дарга Б.Гарамгайбаатар бол Н.Алтанхуягийн хүн. Тиймээс Н.Алтанхуягийн хатгалагаар Зам тээврийн яамныханд хариуцлага тооцох ёстой гэсэн мессежийг олон нийтэд илгээж болох л юм. Сүүлийн үед гаргаж буй хүнд суртал нь ч түүнийг явуулах шалтаг болж байж мэднэ.

УИХ-ын үйл ажиллагааг хүндэтгэхээ больсон мөн салбараа удирдаж чадахгүй байгаа гэх мэт түм буман шалтгаанаар Б.Батзаяаг халах асуудлыг ярьж магадгүй байгаа аж. Зам тээврийн яамны сайд А.Гансүх Н.Алтанхуягтай санаа нийлж төмөр замын асуудлыг шийдэхээр болсон. Харин Х.Баттулгын гэрийн хамгаалагч байсан Б.Батзаяа том даргынхаа талд ороод ажил хийлгэхгүй байгаа гэнэ. Энэ нь ортой яриа. Тухайлбал Зам тээврийн яамнаас зарласан тендерт ялж ажил гүйцэтгэсэн компаниудын мөнгийг Б.Батзаяа өгөхгүй луу унжиж байсан. Гэтэл тухайн компаниуд нь Алтангадасын зарим гишүүдийн компани байсан гэнэ. Тийм учраас бүх зүйлд сөрж зогсоод буй түүнийг явуулах талаар Алтангадасынхан эрчимтэй хөдөлж эхэлжээ.