Нийслэлийн ИТХ-ын тэргүүлэгч 18 гишүүн татварын төлөгчдийн мөнгөөр Бразиль явж хөл бөмбөгийн тэмцээн үзэх болсон тухай мэдээлэл өчигдөр цахим ертөнцөд шуугиан тарилаа.

Улс орны эдийн засаг хямарч иргэдийн амьжиргаа орлого хүндэрч улсын төсөв хэдэн зуун тэрбумаар тасарч байхад нийслэлийн иргэдийн итгэлийг олж сонгогдсон тэргүүлэгчид татвар төлөгчдийн мөнгөөр Бразил, Куба улсад хурлын туршлага судлах нэрийдлээр амарч зугаалах гэж байгааг олон нийт маш их эсэргүүцэж байна. Засгийн газар эдийн Засгийг эрчимжүүлэх 100 өдрийн арга хэмжээний хүрээнд авч хэрэгжүүлсэн нэг чухал санаачлага нь төсвийн мөнгөөр гадаад улсад туршлага судлах нэрийдлээр амарч зугаалахыг хориглосон явдал юм. Гэтэл нийслэлийн иргэдийн төлөөлөгчдийн тэргүүлэгчид энэ бүхнийг үл тоомсорлож Бразил явахаар билетээ хүртэл захиалжээ.

    Зугаалагчдын бүрэлдэхүүнд ИТХ дахь АН-ын бүлгийн дарга Б.Отгонбаяр, Баянгол дүүргийн Засаг дарга Б.Оросоо, Эрүүл мэндийн дэд сайд Ж.Амарсанаа, нийслэлийн засаг дарга асан Б.Мөнхбаяр нарын нэр бүхий 18 хүн багтжээ. Татвар төлөгчдийн мөнгийг хувийнхаа амралт зугаалганд туршлага судлах нэрийдлээр ингэж зарцуулахаар болсон нь төр засгийн өндөрлөгүүд анхаарлыг нэлээд татаж энэ асуудал багагүй өндрөө авсан байна. Зөвхөн нийслэлийн төсөвт л гэхэд 1.4 тэрбум төгрөгийн гадаад томилолтын арга хэмжээнд зарцуулахаар төсөвлөсөн нь ил болж ард иргэд үнийг маш ихээр шүүмжлэх боллоо.
    Тэгвэл татварын төлөгчдийн мөнгийг ийнхүү дураараа үрэлгэн зарцуулах гэж байгаад холбогдох хүмүүс арга хэмжээ авч байр сууриа илэрхийлж эхэллээ. Тухайлбал МАН-ын удирдлагууд энэ асуудлаар зөвлөлдөж тус айлчлалын бүрэлдэхүүнд багтсан өөрийн намын харьяат тэргүүлэгчдийг явахыг нь хориглосон байна. Харин УИХ-ын дарга З.Энхболд өөрийн твиттер хуудсандаа “Дарханы ИТХ Дубай руу зугаалсныг аудит шалгаад өөрсдөөр нь төлүүлэхээр болсон. Бразил явсан УБ ИТХ төлөөлөгчид ялгаагүй хувиасаа төлнө” гэж байр сууриа илэрхийлж тэдэнд арга хэмжээ авна гэдгээ сануулсан байна. Гэтэл татварын төлөгчдийн мөнгийг ингэж зоргоороо зарцуулж байгаад хяналт тавих үүрэгтэй Нийслэлийн аудитын газрын дарга Ц.Очирбат энэ бүрэлдэхүүнд багтсан байх юм. Үүнд эгдүүцсэн жиргээчид “Аудитын даргаа оруулчихсан юм чинь асуудалгүй биздээ” гэх зэргээр шоглож тэдэнд “Монгол Улсын улс төрийн эвлэрлийн шигшээ баг” гэсэн нэрийг өгөөд байна. Түүнчлэн халуун орны үхэр судлахаар явах гэж байгаа хүйтэн Монголын төлөөлөгчиддөө амжилт хүссэн шог мэндчилгээг ч дайх ажээ.

    Хяналт тавих ёстой аудитын дарга нь хүртэл төлөөлөгчидтэйгээ нийлээд татварын төлөгчдийн мөнгөөр зугаалж буй энэ үйлдэлд З.Энхболд дарга хэрхэн хариуцлага тооцож чадах уу? Гэдгийг ард иргэд харах л үлдлээ.