Чуулганы хуралдаанаар Ш.Түвдэндоржийг ҮХАА-н сайдаар томилох эсэх асуудлыг хэлэлцэж байна. МАН-ын бүлэг энэ асуудлаар завсарлага авах санал гаргасан ч хуулинд 30 хоногийн дотор шийдвэрлэх ёстой гэж заасан байдаг учир өнөөдөр хэлэлцэнэ. Ерөнхий асуудлаар завсарлага авах боломжгүй гэсэн тайлбарыг УИХ-ын дэд дарга Р.Гончигдорж хэллээ.

Гишүүд асуулт асууж, хариулт авав.

УИХ-ын гишүүн М.Энхболд "Сайд томилох асуудлыг 30 хоногийн дотор шийдвэрлэх ёстой гэж хуулинд заасан байдаг гэлээ. Тэгвэл Эдийн засгийн байнгын хорооны хурлаар Н.Батбаяр сайдыг огцруулах асуудлыг  яагаад хэлэлцэхгүй байгаа юм. Бас л 7 хоногийн дотор шийдвэрлэх ёстой шүү дээ. Ингэж ялгавартай хандаж болохгүй.  Мөн бид "давхар дээл"-ний асуудлыг маш удаан ярилаа. "Давхар дээл"-тэй хүнийг томилбол УИХ-ын дахиад л чадамжгүй болно. Уг асуудлаар хуулийн дагуу Ерөнхийлөгчтэй зөвшилцөх ёстой. Тэгээд яагаад Ерөнхийлөгчийн байр суурийг харгалзаж үзэхгүй байгаа юм бэ" гэв.

Холбогдох байнгын хорооны дарга Г.Баярсайхан түүний асуултад хариулахдаа "Эдийн засгийн болон Хүнс, хөдөө аж ахуйн байнгын хорооны хамтарсан хуралдаанаар тус яамны сайдад нэр дэвшигчийн асуудлыг дэгийн дагуу хэлэлцсэн. Ямарваа нэгэн дэг зөрчсөн асуудал байхгүй. Ихэнхи гишүүд дэмжсэн. Хөдөө аж ахуйн салбар бол стратегийн чухал салбар. Тэгэхээр энэ салбарыг газар тариалангийн ажил эхлэхээс өмнө хурдан эзэнтэй болгох хэрэгтэй гэж бодож байна" гэлээ.

Харин Ерөнхий сайд Н.Алтанхуяг "Бүх зүйл хуулийн дагуу явагдаж байгаа. Хууль зөрчсөн зүйл байхгүй. МАН-ынхан олонхи байхдаа "давхар дээл"-тэй байж болно гэсэн хуулийг гаргасан. Тэр хуулийн чинь дагуу явж байгаа" гэлээ.

УИХ-ын гишүүн Г.Уянга “Нэр дэвшигчийг хувь хүнийх нь хувьд татгалзах боломжгүй. Сонгогчидтойгоо уулзаж байхад хамгийн их яригддаг зүйл бол улстөрийн хямралыг давах эхний шаардлага нь “давхар дээл”-ийн асуудал байна. Х.Баттулга сайд “давхар дээл”-ээс татгалзсан, Ерөнхийлөгч татгалзсан байхад Үндсэн хуулиар олгогдсон ч ёс суртахууны асуудлыг хөндөөгүй юу. Нэр дэвшигч өөрөө  юу гэж бодож байна вэ” гэсэн асуултад Ерөнхий сайд Н.Алтанхуяг “Энэ асуудал бол хуулиар зохицуулагдсан асуудал. Энэ хаваржин ярьсан шүү дээ” гэлээ.

Г.Баярсайхан “Байнгын хорооны хувьд салбараа харж ургац алдахгүй, мал аж ахуйн салбар унахгүй байх үүднээс салбараа унагаахгүйн тулд “давхар дээл” ярьмааргүй байна. Одоо байгаа хүмүүстэйгээ зохицоод ажиллах, салбараа унагаахгүй байх хүн л чухал” гэлээ.

Нэр дэвшигч Ш.Түвдэндорж “Хуулийн эрх зүйн асуудлыг нь хүн бүр мэдэж байгаа. Ёс суртахууны асуудал ямар байх нь харьцангуй ойлголт. Ард иргэд илүү их өөрсдийн амьдралаа сайжруулах тал дээр санаа тавьж байгаа байх. Түүнээс УИХ-ын гишүүд хэн нь томилох, огцрох талаар санаа зовохгүй байна гэж бодож байна. Мөн би намын шийдвэрийн хүрээнд энэ шийдвэрээ гаргаж байгаа” гэлээ.