УИХ-ын чуулганы өнөөдрийн нэгдсэн хуралдаанаар УИХ-ын гишүүн Ш.Түвдэндоржийг ҮХАА-н сайдаар томилох эсэх асуулыг хэлэлцэж байна.

МАН-ын бүлгийн гишүүдийн зүгээс Ш.Түвдэндоржийг “давхар дээл”-тэй байгаа учир дэмжихэд хүндрэлтэй байна гэдэг саналыг хэлэв. Мөн түүнийг ҮХАА-н сайдаар томилогдвол ямар ажлыг хамгийн түрүүнд хийх талаар сонирхож байлаа. Зарим гишүүд түүнийг хөдөө аж, ахуйн салбарын хүн биш учраас яамны ажлыг хийгээд явж чадахгүй гэсэн шүүмжлэлийг хэлэв.

Сайдад нэр дэвшигч Ш.Түвдэндоржийн хувьд мөрдөгдөж буй хуулийн дагуу нэр дэвшсэнээ тайлбарлаад цаашид хөдөө аж ахуйн салбарт илүү түлхүү ажиллана гэсэн юм.

 Мөн Ерөнхий сайд Н.Алтанхуяг түүнийг томилох асуудлаар “Үндсэн хуулиар зөвшөөрсөн. 2016 оноос давхардлыг багасгая гэж хаваржин ярьсан. Давхардлыг 2016 оноос хэрэгжүүлэх биш үймээн болгосон учраас л больсон. Үүнийг нь хаа хаанаа анхаарах ёстой байх. Сайд нарыг УИХ-аас томилох ёстой гэж би хувь хүнийхээ хувьд боддог.  Ш.Түвдэндорж хоёр удаа УИХ-ын гишүүн, нэг удаа сайд хийсэн хүн. Ажлыг сайн хийж чадах хүнээ сайдаар сонгодог” гэлээ. 

Харин УИХ-ын гишүүн З.Баянсэлэнгэ “УИХ дээр хэлэлцэж байгаа аливаа асуудлыг УИХ дахь бүлгүүд байр сууриа нэтгэдэг. Гэтэл Ш.Түвдэндоржийн асуудал дээр “Шударга ёс” эвслийн бүлэг хуралдаж, байр сууриа нэгтгээгүй байхад энэ асуудлыг оруулаад ирдэг нь яаж байгаа юм бэ. “Шударга ёс” эвслийн бүлгийн зүгээс энэ асуудлыг хойшлуулах горимын санал гаргасан ч байнгын хороо дэмжээгүй. Бүлгүүд зөвшилцөөгүй байхад энэ асуудлыг хэлэлцэж болдог юм уу. Эдийн засаг хүнд байхад Н.Батбаяр сайдыг нь огцруулах асуудлыг хамтад нь хэлэлцэж яагаад болохгүй байгаа юм бэ” гэсэн асуултад Г.Баярсайхан “Хамтарсан байнгын хорооны хуралдааны үеэр З.Баянсэлэнгэ гишүүн горимын санал гаргасан ч гишүүд дэмжээгүй. УИХ өөрөө дэгтэй. Танай бүлэг яагаад хуралдаагүй гэдэг нь танай бүлгийн дотоод асуудал байх” гэлээ.

УИХ-ын гишүүн О.Содбилэг “Шударга ёс” эвслийн бүлгийн хурал дээр Ш.Түвдэндоржийн асуудлыг яриагүй байхад яагаад эвслийн бүлэгт танилцуулаагүй юм бэ. Дан ганц АН-ын шийдвэр юм бэ” гэсэн асуултад  Б.Гарамгайбаатар “УИХ-ын даргын зөвлөлөөр хэлэлцээд журмын дагуу явсан. Улстөрийн намууд улстөрийн шийдэл гаргадаг. Түүний дагуу явсан” гэлээ. Мөн энэ асуултад  Ерөнхий сайд Н.Алтанхуяг “Бид эвсэлтэй хамтарч ажиллана. 2020 он хүртэл хамтарч ажиллах гэрээ байгуулсан. Эвслийн бүлэг дотроо саналаа нэгтгээгүй юм шиг байна. Бид хамтраад шийдвэрээ гаргаад явж байгаа” гэлээ.