Үдээс хойшхи чуулганы хуралдаанаар Ш.Түвдэндоржийг ҮХАА-н сайдад томилох эсэх асуудлыг үргэлжлүүлэн хэлэлцэж байна.

Гишүүд асуулт асууж, хариулт авч байна.

Тодруулбал УИХ-ын гишүүн Ө.Энхтүвшин “АН дотор сайд хийх боломжтой олон хүн байгаа. 2014 онд хийсэн судалгаагаар УИХ-ын гишүүн, Засгийн газрын гишүүнийг давхар хашихгүй гэсэн судалгаагаар 78 хувь нь дэмжихгүй гэж хариулсан” гэсэн асуултад Ерөнхий сайд Н.Алтанхуяг “УИХ дээр бид байгаа Үндсэн хууль болоод өнөөдөр мөрдөгдөж байгаа хууль тогтоомжийн хүрээнд л ярина. Өнөөдөр УИХ социологийн судалгааг ярихгүй. Энэ судалгаан дээр үндэслэн хуулиа өөрчлөе гэвэл болно. Дэлхий дээр ч гэсэн ийм практик олон бий.  Өнгөрсөн Засгийн газарт гэхэд хоёр сайд нь гаднаас байсан бусад нь хавсран гүйцэтгэж байсан. Үүнийгээ өөрчлөе гэвэл 2016 оноос хэрэгжүүлэе гэдгийг шийдээд явж болно” гэлээ.

Мөн УИХ-ын гишүүн Д.Хаянхярваа “Бид нарыг Ш.Түвдэндоржийг асуудлаар завсарлага авах гэхэд ҮХАА-н яам сайдгүй боллоо. Үйлдвэр хөдөө аж ахуйн салбарын ажил уналаа гэх мэт юм ярих юм. Тэгвэл Н.Батбаярын сайдын асуудлыг үүн шигээ шийдээч. Ард түмний амьдрал доройтож талхийг таллаж хувааж авч байна. Эдийн засаг тартагтаа тултал уналаа. Ингэж байхад Н.Батбаяр сайдтай хариуцлагыг яагаад ярихгүй байгаа юм бэ. Тийм л шуурхай юм бол сайд огцруулах асуудлаа 7 хоногийн дотор нь шийдээд яваач ” гэсэн саналыг хэлэв.