Эдийн засгийг эрчимжүүлэх "Эзэн-100" хөтөлбөр үргэлжилж байна. Энэ хөтөлбөрийн дагуу эдийн засаг эрчимжиж байгаа юм алга. Харин ч өдөр бүрээр л өргөн хэрэглээний бараа бүтээгдэхүүний үнэ нэмэгдэж, ард түмнийг айдас хүйдэст автуулж эхлэв. Гэвч эрх баригчид бүх юм сайхан байгаа тухай "100 хоногийн үлгэр"-ээ ярьсаар 30 хоногоо авлаа.

    Харин АН доторх юм ойлгодог, эрүүл саруул сэтгэлгээтэй, бизнес эрхэлж байсан хүмүүс эдийн засаг хүндрэх болсонд ихээхэн санаа зовох боллоо. Тэд өөр хоорондоо эдийн засгаа тавиад туучихлаа. Энэ хүнд байдлаасаа яаж гарах вэ? Ирэх сонгуульд бид өр зээл, эдийн засгийн хямралаас болж л сүйрэх байх даа гэж ярилцах болсон гэж эх сурвалж мэдээллээ. Тухайлбал УИХ-ын гишүүн С.Одонтуяа "Хөлбөмбөг гэж хөөрцөглөхийн оронд эдийн засгийн онц байдал тогтоомоор байна. Ноцож эхэлсэн гал маань түймэр болохоос өмнө унтраахгүй бол ноцтой" гэж ил тодоор зарлав. Зарим нэг шүүмжлэгчид "дөрвөн жилд нэг болдог хөлбөмбөг болж байхад энэ авгай юу яриад байнаа. Өөрсдөө асуудлаа хүндрүүлчихээд" гэх мэтээр сүржигнэн шүүмжлэх л байх. Хамгийн гол нь АН-ын бүлгийн дарга С.Одонтуяа асуудлыг орой ч гэсэн ойлгож санаа зовж эхэлсэн нь чухал юм. 

    АН-ын бүлгийн дэд дарга өмнө дандаа эдийн засаг сайхан байгаа тухай үлгэр яригчдын талд байсан юм. Харин энэ удаа ард түмнээ тэгж хуурах хүмүүстэй нийлээд хол явахгүйг сайтар ухаарчээ. Ингэж ухаарахад түүний бизнес ч нөлөөлөө биз. Бүхий л бизнес хүндрэлтэй болж эхэлсэн учир түүний бизнес ч гэсэн асуудалтай болж эхэлсэн байж мэднэ.

    Үнэхээр хөлбөмбөг рүү бүхний анхаарлыг чиглүүлж, хаа байсан холын Бразил руу төсвийн мөнгөөр зугаалж тансаглахын оронд бодит байдалтайгаа эвлэрч хүндэрсэн эдийн засгаа сайжруулахын төлөө бүгд ажилламаар байна. С.Одонтуяа гишүүн шигээ эрх баригчид "эдийн засагтаа онц байдал тогтоох" хэрэгтэй. Тэгвэл хариуцлага хүлээж байгаа эрх баригчид, өдөр бүрээр амьдрал нь дордох ард түмэнд л ашигтай.

    Нилээд хэдэн сарын өмнө МАН-ын УИХ-ын гишүүд "эдийн засагт гал гарлаа" гэж хэлээд "алуулангаа" алдсан. Харин одоо тэдний зөв байж. Эдийн засагт гал гарч эхэлснийг АН-ын бүлгийн дэд дарга хүлээн зөвшөөрлөө. Бүр асаж эхэлсэн гал түймэр болж магадгүйг анхааруулан сануулж арга хэмжээ авахыг уриаллаа. Үнэхээр манай эдийн засаг эрчимжих биш улам л хүндэрч байна. Эдийн засгийг эрчимжүүлэх 100 хоногийн төлөвлөгөө үлгэр болох өдөр улам л ойртож эхэллээ.