Өнөөгийн улс төрийн тогтолцоог шүүмжилж буйгаа албан тушаалаасаа сайн дураараа татгалзаж үзүүлсэн УИХ-ын гишүүн Х.Баттулга олны анхаарлыг дахин татаж эхэллээ. Сайдын суудлаасаа бууснаас хойш өнөөдрийг хүртэл чимээгүй байсан тэрбээр өөрийгөө цаашид сөрөг хүчин болно хэмээн зарлав.

Тэрбээр Н.Алтанхуягтай таарамж муутай байснаас болж мөн “давхар дээл”-ээс татгалзаж сайдын ажлаа өгсөн гэдэг. Тодруулбал, зургаан сарын турш олон нийтийн анхаарлын төвд яригдсан “давхар дээл”-ийг тайлах хуулийн төсөл УИХ-аар дэмжигдээгүй төгссөнд тэрбээр ундууцаж, албан тушаалаасаа татгалзсан билээ. Тэрбээр цаашид ганц УИХ-ын гишүүний ажлаа хийгээд явна.

 “Давхар дээл”-ээсээ татгалзсаны дараа олон нийт түүнийг “шударга хүн”, “улс төрчдөд өөрөөрөө үлгэр дууриалал үзүүллээ”, “Х.Баттулга шиг улсын ажлыг хийж чадах хүн байхгүй” зэргээр магтаж байв.

Харин ганц л хүн Х.Баттулгыг Өмнөд Солонгосын Севол хөлгийн ахмадтай зүйрлэсэн. Тэр нь УИХ-ын гишүүн Ц.Нямдорж. Тэрбээр “Х.Баттулгыг зүгээр нэг "давхар дээл"-ийг тайлах гэж Засгийн газраас гарч байна гэж би бодохгүй байна. Ардчилсан намын сонгуулийн мөрийн хөтөлбөр хэрэгжих боломжгүй болсон мөн эдийн засаг уналтад ороод ирэхээр багаа хаяаад зугатаж байна. Энэ бол Х.Баттулгын чаддаг ажил. 2012 онд Ардчилсан нам Засгийн газраас гарахад Х.Баттулга Н.Алтанхуягаасаа түрүүлээд мэдэгдэл хийх гээд байсан. Харин Н.Алтанхуяг нь хулхидуулахгүй гэж сандраад түрүүлж мэдэгдэл хийж байсан удаатай. Ийм увайгүй нөхрөөс салж байгаад чинь Засгийн газарт баяр хүргэе. Бас Засгаас зайлж байгаад чинь дахин талархал илэрхийлье Х.Баттулга аа” хэмээн хатуухан шүүмжлээд авсан.

Мөн Монголын парламентын завхарал болоод буй “давхар дээл”-ийг эсэргүүцдэг юм бол юу хийж анхнаасаа дээлээ давхарласан юм гэж хэлэх хүмүүс ч байсан. Тэгвэл тэрбээр одооноос эхлэн шүүмжлэгчийн байр сууринаас сөрөг хүчний байр суурьт  шилжихээр болсон байна. Түүнд үүнээс өөр сонголт ч байхгүй гэнэ.

 Тэрбээр энэ талаар ярихдаа “Цаашид өөрийн зарчмаа  барина. Мэдээж ганцаараа биш. Ардчиллын төлөөх олон намын эцэг байгууллага болсон МоАХ энэ цаг үед шударга бус зүйлтэй эвлэрдэг, өөгшүүлэгч байх ёсгүй. Одоо анх 1990 онд эхлүүлсэн зорилгоо гүйцээхийн төлөө илүү тууштай, илүү зоримог, илүү шийдэмгий тэмцлийн хэлбэрүүдийг ашиглахаас өөр аргагүй болж байна. Намаас дэмжлэг алга, бүх фракцаа албан тушаалаар хүлчихсэн. Тэглээ гээд яахав, бид хонхоо дуугаргаж, хийх ёстойгоо хийнэ” гэж ярьжээ. Үүнээс үзвэл тэрбээр удахгүй улс төрд хүчтэй дуугарч эхлэх нь. Бүр сөрж гарч ирэх нь. Улс төрчдийн гаргаж буй шударга бус зүйлтэй эвлэрч, өөгшүүлэхгүйн тулд өөрийн биеэр үлгэр болохоор шийджээ.

Энэ талаар тэрбээр “Уг нь өнөөдөр засгийн эрх барьж, шинэчлэл ярьж байгаа гэдэг утгаараа АН эхлэж өөрчлөгдөх, шинэчлэгдэх, эрүүл саруул юм ярьдаг болох нь хамгийн зөв эхлэл” гэжээ. 

Түүнийг хэнд ч дийлдэггүй зөрүүд гэж ярьдаг. Сүүлийн үед намынхаа эсрэг дуугарах болсоныг ч үүнтэй холбон тайлбарладаг. Мөн зарим хүмүүс түүнийг Ерөнхий сайд болохын тулд зориудаар намынхаа нөхдийн эсрэг хөдөлж эхэллээ гэж байгаа. Тэгвэл тэрбээр өөрийгөө Ерөнхий сайд болохгүй гэв. Харин Ерөнхий сайд болсон хүнд асар сайн менемжентийн дэмжлэг үзүүлнэ. Туршлага ч байна гэжээ. Н.Алтанхуягийн Засгийн газарт сайн менежмэнт хийх боломж өөрт нь олдоогүй учраас дараа дараагийн Засгийн газарт тэрбээр орж ажиллана гэдэг санаагаа энэ үгээрээ илэрхийлсэн байна.  Тэрбээр хоёр Засгийн газарт ажиллахдаа гурван Ерөнхий сайдын нүүрийг үзсэн. Тодорхой хэлбэл С.Баяр, Сү.Батболд, Н.Алтанхуяг. Харин энэ гуравтай хамтарч ажиллахад хамгийн гайгүй нь С.Баяр байсан гэж хэлсэн нь олны анхаарлыг ихэд татлаа.

Тэрбээр “С.Баяр чинь юм ойлгодог, хориг саад тавилаа гэхэд болгоомжлолоо ил шууд хэлдэг байсан. Нөгөө хоёр нь ашиг сонирхлын зөрчилдөө нэвт баригдсан хүмүүс. Би хоёр яам удирдлаа. Салбарынхаа хөгжлийн бодлогыг мэргэжлийн багтай хамтраад гаргачихсан. Гэтэл тэрнийг маань цаасан дээрээс цааш бүтээн байгуулалт болгож явуулах сонирхолгүй. Хамтарсан засагт байхдаа ярьсан, мөнгө өгөөгүй. Айлын халаасны өрөөнд байгаа юм аргагүй юм болов уу гээд өнгөрөөсөн. Дараа нь өөрийнхөө намын засагт орж ирээд өнөөхөө ярилаа. Гэтэл жаахан мөнгө дусаагаад л орхисон. Тэгээд л томоор сэтгэх, том бодлого хэрэгжүүлэх чадвар, сонирхол Монголын төрд байхгүй юм байна гэж бодох болсон доо” хэмээн ярьжээ.