УИХ-ын нэгдсэн чуулганы өнөөдрийн хуралдаанаар Гэр бүлийн хүчирхийлэлтэй тэмцэх тухай хуулийн төслийг хэлэлцэж байна. Сүүлийн үед гэр бүлийн хүчирхийлэл газар авч, хүний амь нас тэр дундаа эмэгтэйчүүдийн амь нас ихээр хохирох болсон учраас тус хуулийг санаачлан боловсруулсан байна. Эрхзүйн зохицуулалтад хохирогчийн аюулгүй байдал, хүчирхийлэл дахин давтагдахаас сэргийлэх зорилгоор хуулийн төслийг боловсруулжээ. Гишүүдийн олонхи нь түүнийг дэмжиж буйгаа илэрхийлээд холбогдох асуудлаар асуулт асуулаа.
УИХ-ын гишүүн Д.Лүндээжанцан “Нийгмийг түгшээсэн анхаарал татсан асуудал бол Гэр бүлийн хуулийн шинэчилсэн найруулга орж ирж байна. 2004 онд анх удаа Гэр бүлийн хүчирхийлэлтэй тэмцэх хуулийн төсөл болсон. Хууль гарснаар хэдэн газар хамгаалалтын байртай болж, төсөв мөнгийг хаанаас гаргах вэ. Энэ хуулийг Эрүүл мэндийн яам дэмжихгүй гэсэн нь ямар шалтгаантай юм бэ” гэсэн асуултад Хууль зүйн сайд Х.Тэмүүжин “2004 онд батлагдсан хууль шинэ хандлага байсан. Гэр бүлийн хүчирхийлэлтэй холбоотой асуудал дээр юу тулгарч байгаа, ямар туршлага байна вэ гээд өнгөрсөн 10 жилийн хугацаанд сайн туршалга хуримталсныг хуульд тусгасан байгаа. Эрүүл мэндийн яам татгалзаж байгаад харамсч байгаа юм. Өөрсдийн салбарт байгаа мэдээллээ мэдэхгүй байгаад нь шүүмжлэлтэй хандсан” гэлээ. Мөн ажлын хэсгээс одоогоор зургаан хамгаалах байр байгаа бөгөөд цаашид аймаг бүрт хамгааллын байрыг нэмэгдүүлж, тухай орон нутгаас төсвийг нь гаргахаар хуулийн төсөлд тусгаад байгаа гэсэн тайлбарийг өглөө.
УИХ-ын гишүүн Ж.Батзандан “Сүүлийн таван жил 1550 бүртгэгдсэн 49 хүн нас барсан гэсэн тоо байна. Үүнээс харахад энэ хуулийг заавал батлах шаардага байгаа юм. Бид бүх үед гэр бүл төвтэй, үнэ цэнэтэй явж ирсэн. Гэр бүл доторхи хүчирхийлэл нэмэгдэж байгаа энэ үед гэр бүлийн хүчирхийлэлтэй тэмцэх цогц бодлогын хүрээнд илүү их зардал, илүү их хүч шаардана. Хамгаалах байр, нэг цэгийн үйлчилгээний тоо нэмэгдэнэ гэж байгаа ч улсын төсвөөс нэмэлт санхүүжилт гарахүй гэж төсөлд тусгажээ. Сум, хорооны нийгмийн ажилтны үүрэг хариуцлага эрс нэмэгдэж байгаа. Нэг хорооны 15 мянга орчим иргэнийг нэг нийгмийн ажилтан хариуцна. Шат шатны хуулийн байгууллагын ачаалал нэмэгдэх учраас төсөв, мөнгөө зөв товлоорой” гэсэн саналаа илэрхийллээ.
УИХ-ын гишүүн С.Эрдэнэ “Энэ хуулийг бүхэлд нь дэмжиж байгаа. Уг хуулийн төсөл дээр Хүн амын хөгжил, нийгмийн хамгааллын яам ч мөн хамтарч ажилламаар байна” гэлээ.
Т.Энхэлээ
