Гадаад харилцааны сайд Л.Болд Монгол Улсад албан ёсны айлчлал хийж буй Латви Улсын Ерөнхийлөгч А.Берзиншийг дагалдан ирсэн тус улсын Гадаад хэргийн сайд Эдгарс Ринкевичстэй 6 дугаар сарын 12-ны өдөр уулзав.

Уулзалтын эхэнд Сайд Л.Болд энэ оны 1 дүгээр сард Латви Улсад хийсэн айлчлалын үеэр ярилцаж байсны дагуу ийнхүү БНЛУ-ын Ерөнхийлөгч Монгол Улсад айлчилж байгаад сэтгэл хангалуун буйгаа тэмдэглэв. Мөн сайд Э.Ринкевичстэй энэ удаа Улаанбаатар хотноо уулзаж байгаад таатай байгаагаа илэрхийлэв.

Түүнчлэн уулзалтын үеэр талууд улс төр, эдийн засаг, соёл, боловсрол болон бусад салбарын хамтын ажилалгааны асуудлаар санал солилцов. Түүнчлэн Латви Улс Европын Холбооны Зөвлөлийг 2015 онд даргалах гэж байгаатай холбогдуулан Монгол Улсын тус холбоотой хөгжүүлж буй харилцаа, хамтын ажиллагааны асуудлаар Латвийн талаас дэмжлэг авах талаар ярилцав.