УИХ-ын гишүүн АН-ын бүлгийн дарга Д.Эрдэнэбат Төрийн ордон дахь өрөөндөө тамхи татсанаас болж гурван сая төгрөгөөр торгуулахаар болсон. Тодруулбал, түүнийг тамхины хяналтын тухай хуулийг зөрчиж өрөөндөө тамхи татсан хэргээр Мэргэжлийн хяналтад шалгуулахаар УИХ-ын гишүүн Д.Эрдэнэчимэг хандсан юм.Д.Эрдэнэчимэг гишүүний санаачлан батлуулсан Тамхины хяналтын тухай хуулинд байшин дотор тамхи татах цэг байгуулж болохгүй зөвхөн гадаа гарч тамхи татна гэж заасан байдаг. Үүнийг засч өрөө тасалгаан дотор тамхи татах цэг байгуулах тухай хуулийн төслийн санаачлагыг УИХ-ын гишүүн О.Баасанхүү өргөн барьж УИХ-аар хэлэлцүүлсэн ч дэмжигдээгүй юм.
Тэгвэл энэ удаа АН-ын бүлгийн дарга Д.Эрдэнэбат “Тамхины хяналтын тухай” хуульд нэмэлт, өөрчлөлт оруулах тухай хуулийн төслийг өргөн барилаа.
Тэрбээр тамхи татах зөвшөөрөгдсөн цэгийг агааржуулалтын тоног төхөөрөмжөөр тоноглогдсон тусгай тасалгаан дотор байна гэж хуулинд тусгаж өгчээ. Мөн тус өрөө тасалгаанд тэмдэг тэмдэглэгээ байрлуулахаар болсон байна. Ерөнхий боловсролын сургуулийн хичээлийн болон дотуур байрнаас 500 метрийн дотор тамхи татах, худалдаалахыг хориглосон заалт дээр нэмж эмнэлэг сувилалын газрыг оруулахаар хуулийн төсөлд тусгасан талаар тэрбээр УИХ-ын даргад хэлэв. Утаат тамхи татах зөвшөөрөгдсөн цэгт тавих стандартыг эрүүл мэндийн асуудал эрхэлсэн Засгийн газрын гишүүн батална гэж хуулийн төсөлд оруулжээ.
Мөн нийтийн хоол, худалдаа, баар,
цэнгээний газар, аж ахуй нэгж байгууллагын ажлын байрны дотоод орчинд
утаат тамхи татах зөвшөөрөгдсөн цэг байгуулж, хуулиар хориглосноос бусад
нийтийн эдэлбэр газарт зөвшөөрөгдсөн цэг байгуулах асуудлыг сум,
дүүргийн Иргэдийн Төлөөлөгчдийн Хурал шийдвэрлэхээр тусгасан байна. Хүмүүс түүний талаар өрөөндөө тамхи татсан хэргээр дахин торгуулахгүйн тулд тус хуулийн төслийг санаачилжээ хэмээн ярьцгааж байна.
Т.Энхэлээ
Сэтгэгдэл (3)