Эрх баригчид Түвдэндоржийг Үйлдвэр хөдөө аж ахуйн сайдаар хэл амтайхан томилууллаа. Ингэснээр УИХ-ын хууль зүйн байнгын хорооны даргын суудлын төлөөх марафон улстөрд өрнөж АН-ынхан энэ суудалд өөр өөрсдийн бүлэглэлийн хүнээ томилуулахаар өвөр хоорондоо жийлцээд эхэлжээ. Эх сурвалжуудын мэдээллэж байгаагаар хууль зүйн байнгын хорооны даргад Ж.Батзанданг томилохоор АН-ынхан дотроо ойлголцолд хүрээд байсан ажээ. Даргын суудлын сураг дуулдаад ирүүт намын даргаа сөрөг хүчинтэйгээ нийлж гөвдөг Ж.Батзандангийн дуу нь шингэрч эхэлснийг улс төрийн хүрээнийхэн онцлох болсон. Хууль зүйн сайд Х.Тэмүүжинг огцруулбал түүний оронд сайдаар очих хүсэлтэй хүн нь Ж.Батзандан байсан. УИХ-ын дарга З.Энхболдын тэргүүлж буй “Шонхор” фракцын хаяг зүүсэн мань эрийн сайдад залрах мөрөөдөлд ноён спикер ч багагүй дэмжлэг үзүүлж явсан гэдэг. Гэвч Х.Тэмүүжинг огцруулах асуудал “лөлө” болсноор Ж.Батзандангийн сайд болох шанс талаар өнгөрсөн билээ. Намынхаа шийдвэр гаргагчдад өргөстэй сандал шиг халгаатай үе үе намын даргаа УИХ-ын нэгдсэн чуулган дээр улалзуулж “сэлэм Догмид” болчихдог түүнийг ямар нэгэн албан тушаал эрх мэдлээр хүлэхгүй бол болохгүй гэсэн уур амьсгал нэлээд өндрөө авч Ж.Батзандан ч Ш.Түвдэндоржийн оронд Хууль зүйн байнгын хорооны дарга болно гэсэн бат итгэлтэйгээр алхах болсон билээ. Намын даргадаа учиргүй дайн зарлаад байсан түүний араншин “инаг хайр лугаа” ижил болж төрх, хэлц нь улам л төв царайтай тогтуун болоод ирсэний учир энэ.

    Гэтэл их санасан газар есөн шөнө хоосон гэгчээр Ж.Батзанданг байнгын хорооны даргад томилохоос “Алтангадас”-ынхан гэнэт буцах болжээ. Эх сурвалжуудын мэдээллэж байгаагаар энэ нь хэд хэдэн шалтгаантай ажээ. Тэд энэ суудалд УИХ-ын гишүүн Д.Ганбатыг томилуулахаар гэнэт бодлоо өөрчилсөн байна. Нам дотроо сөрөг хүчин болно гэдгээ албан ёсоор зарлаад байгаа Х.Баттулгын тун ойрын хүн “МоАХ” дотроо тодорхой нөлөөтэй Д.Ганбатыг талдаа татснаар тэр Х.Баттулгаасаа нүүр буруулж “Алтангадас”-ыг дагах болсон байна. Ингэхдээ зөвхөн ганцаараа очоод зогсохгүй бараа бологчдоо чирээд “Алтангадас”-ын хана хэрмийг бататгаж өгөх бололтой. Эрх мэдэл албан тушаалаар хангалттай хүлэгдсэн “Шонхор” фракцаас хүн татаж байхаар хүч нөлөө нь аюул дагуулж мэдэх “МоАХ”-г дотроос нь задалж өөртөө хүч нэмэх арга сиймхийг Н.Алтанхуяг хэрэгжүүлж эхэлснээр улс төрийн уран чадварлаг менежер гэдгээ ийнхүү дахин нотолж байна. Харин даргын суудлаас хамраараа тасдуулсан Ж.Батзандан нэлээд ууртай байгаа бөгөөд Д.Ганбаттай зад авалцаж, хэрүүл маргаан тасрахаа байсан гэнэ.

    Н.Алтанхуяг Үйлдвэр хөдөө аж ахуйн сайдад өөрийнхөө фракцаас хүн томилох, эсвэл Ерөнхийлөгчид найр тавин түүний санал болгосон хүнийг дэмжиж болох байсан ч багагүй эсэргүүцлийг үл хайхран Ш.Түвдэндоржийг зүтгүүлсээр байгаад авч гарсан. Х.Баттулга “Би Ш.Түвдэндоржийг сайд болохыг дэмжихгүй” гэж хэлснээр “МоАХ”-ны доторх хагарал нэлээд хүчтэй, гүн гүнзгийн явагдаж эхэлснийг харуулсан юм. Харин “МоАХ” дотроо тодорхой хэмжээний бараа бологчидтой Ш.Түвдэндорж Алтангадаст хүчээ өргөснөөр тэд 2012 оны сонгуулийн дараа арга буюу бусдад хуваарилсан үйлдвэр, хөдөө аж ахуй, жижиг дунд үйлдвэрлэл зэрэг улс орны нийгэм эдийн засагт голлох нөлөөтэй томоохон салбаруудыг бүгдийг нь гартаа оруулж удирдлагаа атгаж чадлаа. Зам тээврийн яамны сайд А.Гансүхийг ч мөн буулгаж авснаар олон жил гацаанд ороод байсан төмөр замын төслөө өөрсдийнхөө төлөвлөснөөр хийх боломжийг ч гаргаад авсан юм. Түүнчлэн Ш.Түвдэндорж, Д.Ганбат нарыг талдаа татснаар тэдний байршуулсан хүмүүс тодруулбал төрийн өмч, нийслэлийн засаг захиргааны багагүй хүчийг хяналтандаа авлаа гэдгийг эх сурвалж онцолж байна.

     Ийнхүү “МоАХ”-ныг дотроос нь задалж юу ч биш болгох замаар “Алтангадас”-ынхан улам хүчээ авч тэд 2016 оны сонгуульд намынхаа гол бодлогыг зангидаж, хэнийг хаана дэвшүүлэх вэ? гэх зэрэг тоглолтыг илт давамгайгаар удирдах мандатаа сунгаж чадлаа. Ерөнхийлөгч, сөрөг хүчин, намынхаа зарим гишүүдийн багагүй эсэргүүцлийг сөрж сайн муу янз янзаар хэлэгдсэний үр дүнд Н.Алтанхуяг өөрийн гараар бүхнийг засаглах баттай хүчийг сая гартаа оруулж чадав. Харин сайдын суудлаасаа сайн дураараа татгалзснаар Х.Баттулга “МоАХ”-нд улам байр сууриа алдаж, шахагдаж эхэлжээ. Улстөрчийнх нь хувьд түүний энэ шийдвэр алдаа болсон гэдгийг болж буй үйл явдлууд тод харуулж байна.