Өнгөрөгч долоо хоногт хуралдсан УИХ-ын чуулганы нэгдсэн хуралдаанаар Үйлдвэр хөдөө аж ахуйн сайдаар УИХ-ын гишүүн, хууль зүйн байнгын хорооны дарга Ш.Түвдэндоржийг томилсон. Түүнийг сайдаар томилуулахаар Ерөнхий сайд Н.Алтанхуяг Ерөнхийлөгчид хандахад “Энэ томилгооноос эхлээд зөв жишиг тогтооё. Ухаалаг төрийн санаачлагыг хэрэгжүүлье. УИХ-ын гаднаас сайд болох хүнийг санал оруулна уу?” гэсэн хариуг Ерөнхийлөгч өгсөн. Гэтэл АН-ынхан Ерөнхийлөгчийн энэхүү байр суурийг авч хэлэлцэлгүй өөрсдийн бодлогоор Ш.Түвдэндоржийг сайдаар томилуулж чадсан билээ.

    Сөрөг хүчний зүгээс “Эдийн засгийн хөгжлийн сайд Н.Батбаярыг огцруулах асуудлыг УИХ хуулийн хугацаандаа хэлэлцэхгүй атлаа шинээр сайд томилох асуудлыг хуулийн хугацаатай гэсэн шалтгаанаар завсарлага өгөхгүй түрж байна хэмээн дургүйцлээ илэрхийлж Ш.Түвдэндоржийг томилох асуудлаар бүх гишүүд асуулт, санал хэлж хурлыг нэлээд ширүүн уур амьсгалтай болгоод авсан. Ийнхүү сайдад нэр дэвшигчийг дэмжих эсэх асуудлаар санал хураалт болоход МАН-ынхан санал өгөөгүй билээ. Ш.Түвдэндоржийг сайдаар томилох асуулт хариултын явцад УИХ-ын гишүүн Ц.Нямдорж “Ямар ч арга алга. Та нар олонхиороо нүдээ аниж байгаад наад хүнээ томилох юм байна. Одоо Ерөнхийлөгчийг л харж байна. Ерөнхийлөгч үнэхээр ухаалаг төртэй больё гэж чин сэтгэлээсээ хүсч байгаа бол Ш.Түвдэндоржийн энэ томилгоон дээр хориг тавих хэрэгтэй” гэж байр сууриа илэрхийлсэн.

    Үүнээс үүдэж Ерөнхийлөгч энэ удаад ч мөн адил байр сууриа илэрхийлээд л өнгөрөх үү? Эсвэл улстөрчийнхөө хувьд бодитой алхам хийх үү? Гэсэн асуулт улстөрийн хүрээнийхний анхаарлыг татах боллоо. Өмнө нь Засгийн газар байгуулагдаж байхад Ерөнхийлөгч сайд нарыг гаднаас оруулж ирэх саналаа хэлж байсан. Гэсэн хэдий ч АН-ынхан олохиороо асуудлыг шийдэж гарсан бөгөөд Ерөнхийлөгч үүнд нь ямар нэгэн хариу үйлдэл үзүүлээгүй. Тэр ч бүү хэл түүний санаачилсан хуулиудыг УИХ дээр унагаж олонхиороо түүний үзэл бодлоос зөрсөн цөөнгүй шийдвэрийг гаргаж ирсэн ч Ерөнхийлөгч энэ бүхэнд огт хориг тавьж байгаагүй. Тэгвэл энэ удаад Ш.Түвдэндоржийн томилгоонд хориг тавих магадлал тун өндөр болоод байгааг эх сурвалж онцоллоо.

    Учир нь Монгол Улсын Ерөнхийлөгч бол төрийн тэргүүн гэсэн утгаараа төрийн эрх барих, шийдвэр гаргах бүх түвшинд манлайлдаг улстөрч. Гэтэл Ерөнхийлөгчийн байр суурийг үл ойшоосон, аргацааж гуйвуулсан хандлага улам бүр газар авсаар байна. Хэдийгээр зөв зүйтэй санаачлага олныг гаргаж, уран цэцэн үгээрээ ард түмнээ байлдан дагуулж байгаа ч түүний хэлсэн бүх үг бичсэн номноос нь цааш халилгүй үлдэхийг тэрээр хүсэхгүй нь ойлгомжтой. Тиймээс улстөрчийнхөө хувьд бодит үйлдэл үзүүлэхгүй бол эрх баригчид цаашид Ерөнхийлөгчийн үгийг үл тоомсорлох хандлага улам гаарна гэдгийг улстөрийн хүрээнийхэн онцлох болжээ. Хэрвээ ийм зүйл болбол Ерөнхийлөгчийн хүч нөлөө, байр суурь, нэр хүнд  ард түмний дунд багагүй унаж, шүүмжлэлд өртөх нь даамжиггүй. Тиймээс түүний хэлсэн олон захиа даалгаврыг биелүүлээгүйн төлөө тэрээр энэ удаад хориг тавих магадлал тун өндөр байгааг ойрын эх сурвалжууд нь онцлох боллоо.

    Хэрвээ Ерөнхийлөгч Ш.Түвдэндоржийг сайдаар томилсон шийдвэрт хориг тавьбал УИХ-ын нийт гишүүдийн 1/3 нь дэмжсэн тохиолдолд хориг хүчин төгөлдөр үйлчилнэ. УИХ-дахь МАН-ын бүлгийн 26 гишүүн Ерөнхийлөгчийн хоригийг хоёр гараа өргөөд дэмжих нь ойлгомжтой. Хэрвээ нөхцөл байдал ингэж эргэвэл эрх баригчид цаашид асуудлыг олонхиороо хүч түрэн шийдэж, Ерөнхийлөгчийн үгийг үл тоомсорлох нь багасах ба ямарваа шийдвэрийг Ерөнхийлөгч, сөрөг хүчинтэйгээ зөвшилцөж гаргах зайлшгүй шахалтанд орно гэдгийг судлаачид онцолж байна.