АН-ын бүлгээс энэ долоо хоногт хэлэлцэх Газрын тухай хуулийн талаар мэдээлэл хийлээ. Мэдээллийг АН-ын бүлгийн дарга Д.Эрдэнэбат, Газрын тухай хуулийн төслийн ажлын хэсгийн ахлагч Б.Гарамгайбаатар, УИХ-ын гишүүн С.Одонтуяа нар өгөв.

Сүүлийн үед газрыг гадаадын иргэнд 60 буюу түүнээс дээш жилээр өмчлүүлэхээр болсон гэх яриа гарсан. Энэ нь худал мэдээлэл бөгөөд гадаадын иргэнд урт хугацаагаар газар эзэмшүүлэх заалт тус хуулинд ороогүй гэж УИХ-ын гишүүн Б.Гарамгайбаатар хэллээ. Харин Газрын тухай хуулийн 44.4-т Монгол улсад байнга /183 хоногоос дээш хугацаагаар/ оршин суугаа гадаадын иргэн, харьяалалгүй хүнд газрыг зөвхөн гэр бүлийн хамтын хэрэгцээний зориулалтаар ашиглуулна гэж заасан гэлээ. Ашиглуулах газрын хэмжээ нь 0.1-0.05 байна гэж хуульд тусгасан байна.

Газрыг гадаадны иргэнд ашиглуулах гэснийг өмчлүүлэх гэж буруу ойлгосон байна гэв. Ер нь өмчлүүлэх, ашиглуулах, эзэмшүүлэхээ ялгахгүй байж улс төр хийж хүмүүст худал мэдээлэл цацаж болохгүй гэж АН-ын бүлгийн дарга Д.Эрдэнэбат хэллээ.

Цаашилбал УИХ-ын гишүүн Ё.Отгонбаяр Газрыг гадны иргэнд өмчлүүлэх гэж байна хэмээн твиттерээрээ жиргэж, олон нийтийг жагсаал цуглаанд уриалан дуудсан байна. Энэ нь УИХ-ын гишүүний ёс зүйд нийцэхгүй бөгөөд худал мэдээллээр олон нийтийн санаа бодлыг үймүүлж байгаа тул холбогдох хуулийн байгууллагууд нь анхааралдаа авахыг тэрбээр мөн сануулсан юм.